Тошкентда эркак хотинини ўлдириш учун 10 минг долларга қотил ёллади

Тошкент шаҳрида шаръий никоҳдаги хотинини ўлдириш учун ёлланма қотилга 10 минг доллар таклиф қилган эркак қўлга олинди. Бу ҳақда пойтахт ИИББ хабар берди.

Қайд этилишича, у қотилликни амалга ошириш учун танишига олдиндан 2 минг доллар берган. Буюртмачи ёлланма қотилга аёлнинг яшаш манзили, хонадон рақами, автомобили, кимлар билан яшаши, қачон уйга кириб-чиқиши ҳақида батафсил маълумотларни тақдим этган.

Тошкент шаҳар ИИББ маълумотига кўра, жиноят-қидирув бўлими ходимлари аёлнинг ҳаётини сақлаб қолиш мақсадида унинг ўлимини саҳналаштириш бўйича махсус тезкор тадбир ўтказган. Бу жараёнда жабрланувчи аёлнинг ҳамкорлиги ва олдиндан ишлаб чиқилган тадбир муҳим рол ўйнаган.

Аёлни ўлдириш учун ёлланган шахс эса тезкор маълумотлар асосида аввалроқ ички ишлар органлари назоратига олинган ва кейинчалик ҳуқуқ-тартибот идоралари билан ҳамкорлик қилган.

Шундан сўнг 20 апрель куни ўтказилган тезкор тадбирда ёлланма қотил буюртмачи билан учрашиб, унга турмуш ўртоғи ўлдирилгани ҳақида хабар берган. Бу хабарни эшитган эркак қолган ҳақнинг бир қисми сифатида 6,5 миллион сўм ҳамда жабрланувчи номидаги қора рангли Tracker автомобилини топширган вақтида ашёвий далиллар билан қўлга олинган.

Ҳозирда мазкур ҳолат юзасидан туман прокуратураси томонидан гумонланувчига нисбатан Жиноят кодексининг 97-моддаси билан жиноят иши қўзғатилган. Унга нисбатан қамоқ эҳтиёт чораси қўлланган, тергов ҳаракатлари давом этмоқда.

2026 йил 27 январь куни Самарқанд вилоятида ёлланма қотиллик жиноятини содир этишнинг олди олинганди. Ҳуқуқни муҳофаза қилувчи органлар томонидан ўтказилган тезкор тадбирлар давомида танишини ўлдиришни режалаштирган шахслар қўлга олинган.