Намангандаги автомобилларга газ қуйиш шохобчаларида 16 ноябрдан бошлаб 1 кубометри 1850 сўмдан 2100 сўмгача кўтарилган метан газ нархи тушишни бошлади. Бу ҳақда Истеъмолчилар ҳуқуқларини ҳимоя килиш жамиятлари федерацияси Наманган вилоят ҳудудий бирлашмаси раиси Орифжон Бойбоев маълум қилди, дея хабар бермоқда «Turon 24».
«Нархлар кўтарилган кундан бошлаб автомобилларга газ қуйиш шохобчаларидаги ҳолатни мониторинг қилишни бошладик. Мониторинг натижалари вилоятдаги шохобчаларда нархлар ўртача 250 сўмга, яъни бир кубометр газ учун 1850 сўмдан 2100 сўмгача ошганини кўрсатди. Молия вазирлиги томонидан нарх оширилиши асоссиз эканлиги ва бу ҳолат давом этган тақдирда санкциялар қўлланиши ҳақидаги огоҳлантирувдан кейин ходимларимиз томонидан қайта мониторинг ўтказилди. 24 ноябрга келиб, нархлар ўртача 2100 сўмдан 1900 сўмгача тушди», — дейди Бойбоев.
Маълум қилишларича, газ қуйиш шохобчалари орасида бундан ҳам арзон – бир кубометр газни 1690 сўмдан сотаётганлари ҳам бор. Бироқ улар бармоқ билан санарли. «Айни пайтда 2100 сўм нархни ҳали пасайтирмаган шохобчалар ҳам учраб турибди», — дейди Орифжон Бойбоев. Бирлашма раисининг ҳисоб-китобига кўра, вилоятдаги газ қуйиш шохобчаларининг 70—80 фоизи нархни пасайтирган.
«Шохобчаларда газ нархи ошганидан сўнг бирлашмамизга ҳайдовчилар ва йўловчилар томонидан қўнғироқлар, Telegram каналимизга мурожаатлар сони кескин кўпайди. Бугунгача шу масалада 140 та мурожаат келиб тушган бўлса, уларнинг асосий қисми — 60 таси Наманган шаҳрига, 35 таси Тўрақўрғон, 30 таси Косонсой, 10 таси Наманган ва 5 таси Янгиқўрғон туманига тўғри келади. Автомобильлар қуяётган газ нархининг кўтарилиши ўз-ўзидан йўлкиранинг ошишига олиб келган. Масалан, мурожаатларда ‘Ҳаққулобод – Лола’ йўналиши 4 минг сўмдан 5 минг сўмга, ‘Учқўрғон – Наманган’ йўналиши эса 4 мингдан 6 минг сўмга кўтарилгани билдирилган. Вилоят марказида ҳам такси ва Damas машиналарида йўлкира ўртача 30 фоизга ошган. Бугундан шохобчаларда нарх эски ҳолатига қайтмоқда, энди йўлкира пасайишини ҳам кузатамиз. Агар ўзгариш бўлмаса, ‘Ўзавтотранc’ агентлигининг вилоят бошқармаси билан ҳамкорликда ишлаймиз», – дейди Наманган шаҳар истеъмолчилар ҳуқуқларини ҳимоя қилиш жамияти раиси Ҳусанбой Алиев.
Вилоятдаги автомобилларга газ қуйиш шохобчаларида нархлар туша бошлаганини ҳайдовчилар ҳам тасдиқлади. «Ҳозир Поп туманидан келяпман. Шохобчада газнинг бир кубометрини 1900 сўмдан қуйиб беришди. Босим ҳам меъёрдагидек, аввалгидек паст эмас», — дейди Акмал Дадамирзаев. Наманган шаҳридаги газ қуйиш шохобчаларидан биридан чиқиб келган «Жигули» ҳайдовчиси Илҳом Собиржонов ҳам нархлар арзонлашганини айтди.
Маълумот учун, бугунги кунда Наманган вилоятида автомобилларга метан газ қуйиш фаолияти билан 77 та шохобча шуғулланмоқда.
Изоҳ (0)