24 ноябрь, шанба куни футбол бўйича Англия премьер лигасининг 13-тур баҳслари доирасида 6 та ўйин якунига етди.
АПЛда 32 очко билан пешқадам бўлиб турган Хосеп Гвардиола бошчилигдаги «Манчестер Сити» мазкур турда Мануэль Пеллегрини қўл остидаги «Вест Ҳэм» майдонига сафар қилиб, 4:0 ҳисобидаги ғалабани қўлга киритди. Ўйинда Лерой Сане дублга эришган бўлса, Давид Силва ва Раҳим Стерлинг биттадан голга муаллифлик қилди.
30 очко билан 2-ўринда бораётган Юрген Клопп шогирдлари — «Ливерпуль» эса сафарда 7-ўринни банд этиб турган «Уотфорд» меҳмони бўлиб, 3:0 ҳисобида ғалаба қозонди. Голлар Муҳаммад Салоҳ, Трент Александр-Арнольд ва Роберто Фирмино ҳисобига ёзилди.
Жозе Моуриньо қўл остидаги «Манчестер Юнайтед» «Олд Траффорд»да «Кристал Пэлас»ни меҳмон қилиб, 0:0 ҳисобида дурангга рози бўлди.
Турнинг марказий ўйини эса Лондонда кечади. Унда «Тоттенҳэм» ўз майдонида «Челси» билан баҳс олиб боради. Қайд этиш жоиз, «Челси» «Тоттенҳэм»дан 1 очко кўпроқ жамғариб 28 очко билан 3-поғонада бормоқда. «Тоттенҳэм» эса 27 очко билан 4-ўринни банд этиб турибди.
Лондоннинг «Арсенал» жамоаси эса ўз учрашувини 25 ноябрь, якшанба куни «Борнмут»га қарши сафарда ўтказади.
Англия премьер лигаси
13-тур баҳслари
24 ноябрь, шанба
Изоҳ (0)