Ўзбекистон Президенти Шавкат Мирзиёев 21 ноябрь куни БМТ Бош котибининг ўринбосари, Женева шаҳридаги БМТ бўлинмаси бош директори Майкл Мёллерни қабул қилди. Бу ҳақда Ўзбекистон Президентининг матбуот хизмати хабар бермоқда.
Давлат раҳбари БМТ вакиллик делегациясининг 22 ноябрь куни Самарқанд шаҳрида ўз ишини бошлайдиган Инсон ҳуқуқлари бўйича Осиё форумида иштирок этиш учун республикага ташрифи БМТ ва Ўзбекистон ўртасида мустаҳкамланиб бораётган икки томонлама ҳамкорликнинг яна бир тасдиғи эканлигини таъкидлаб ўтди.
Мулоқот давомида Ўзбекистон Республикасининг БМТ билан икки томонлама ҳамкорлиги ривожланишининг истиқболлари, шунингдек, халқаро ва минтақавий кун тартибидаги муҳим масалалар муҳокама қилинди.
Орол иқтисодий ҳалокати оқибатларини юмшатиш бўйича дунё ҳамжамияти ҳаракатларини бирлаштиришга алоҳида эътибор қаратилди.
Томонлар, шунингдек, Афғонистондаги вазиятни тартибга солишда ҳар томонлама кўмак кўрсатиш масалаларини кўриб чиқди.
БМТ Бош котиби ўринбосари Майкл Мёллер илиқ қабул учун давлат раҳбарига миннатдорлик билдирди, шунингдек, БМТ Бош котиби Антониу Гутерришнинг самимий салом ва эзгу тилакларини етказди.
Майкл Мёллер БМТ Ўзбекистоннинг Марказий Осиёда ўзаро ишонч, яхши қўшничилик ва конструктив ҳамкорлик алоқаларини мустаҳкамлаш бўйича ҳаракатларини тўлиқ қувватлашини билдирди.
БМТнинг Ўзбекистон билан кўп қиррали ҳамкорликни чуқурлаштиришга тайёрлиги тасдиқланди.