Тожикистон ҳукуматининг «2019 йилги давлат бюджети тўғрисида»ги қонун лойиҳасида мамлакатнинг турли қисмларида мактаблар ва шифохоналар қураётган 2 та ўзбек, 2 та хитой ва 1 та туркман компанияси учун солиқ имтиёзларини жорий қилиш таклиф қилинган. Бу ҳақда Asia Plus нашрига таяниб, Turon 24 хабар берди.
Унга кўра, Файзобод туманидаги Элок қишлоғи ва Ваҳдат шаҳрининг Чорда қишлоғида мактаб қураётган компания қўшимча қиймат солиғи (ҚҚС), автомобиль ва даромад солиғидан озод қилинади. Хитойнинг ТBEA компанияси ушбу қишлоқларда мактаблар қурмоқчи.
Хитой, шунингдек, Тожикистонда 40 минг талабага мўлжалланган университет қуришга ҳам ваъда берган. Ташкил этиладиган университетда кўплаб хорижий мамлакат абитурентлари ҳам ўқиш имконига эга бўлади.
Спитамен туманида 630 ўринга мўлжалланган умумий ўрта таълим мактабини қураётган ва Қубодиёнда тиббиёт бирлашмасини ташкил қилаётган ўзбек компанияси ҳам ҚҚС, автомобиль ҳамда даромад солиғидан озод қилинади.
Туркманистоннинг Тожикистондаги элчихонаси ҳам бир қатор имтиёзларга эга бўлади. Элчихона Дўсти туманида 540 ўринга мўлжалланган умумий ўрта таълим мактабини ташкил этмоқчи.
Бундан ташқари, юқорида кўрсатиб ўтилган объектларни қуриш учун мижозлар ва бош пудратчилар томонидан олиб бориладиган товарларни импорт қилиш Тожикистон ҳукумати томонидан тасдиқланган рўйхатга кўра ҚҚС ҳамда божхона тўловларидан озод қилинади.
Изоҳ (0)