Наманган вилоятининг Норин тумани ички ишлар бўлимида баландлиги 35 метр бўлган давлат байроғи ўрнатилди. Бу ҳақда «Дарё»га туман ИИБ бошлиғининг биринчи ўринбосари Мурод Ҳакимов маълум қилди.
— Байроқ 18 ноябрь — давлат байроғи қабул қилинган сананинг 27 йиллиги нишонланган куни ИИБ майдонида кўтарилди. Байроқ учун турли фаслларга мўлжалланган мато танланган, тунда ёритиб туриш учун чироқлар билан безатилган. Келгусида бу ерда хизмат вақтида ҳалок бўлган ички ишлар органи ходимининг монументини ўрнатиш ҳам кўзда тутилган, — дейди Мурод Ҳакимов.
Давлат байроғи устуни Наманган шаҳридаги «Мехмаш» корхонаси, мато эса туман коммунал хизмат идораси ходимлари томонидан тайёрланди. Унинг ўлчами 12 га 6 метрни ташкил этади.
Маълумот учун, жорий йил август ойида Наманган шаҳрининг Ислом Каримов ва «Ғирвонсой» кўчалари кесишмасида баландлиги бўйича Тошкентдагидан сўнг иккинчи ўринда турадиган Ўзбекистон байроғи ўрнатилганди. Ушбу байроқнинг баландлиги ҳам 35 метрдан иборат.
Изоҳ (0)