Россиянинг Саратов вилояти Озинский туманидаги темирйўл кесишмаида юз берган поезд ва автобус тўқнашуви оқибатида беш ўзбекистонлик ҳалок бўлди. Бу ҳақда «РИА Новости» хабар бермоқда.

17 ноябрь куни маҳаллий вақт билан 12:00 да (Тошкент вақти билан 13:00 да) Саратов вилояти Озинский туманидаги тартибга солинмаган темирйўл кесишмасида «Саратов — Уляновск» йўланиши бўйлаб қатновчи Mercedes русумли автобус юк поезди билан тўқнашиб кетган («Россия темир йўллари» компанияси маълумотларига кўра, айбдор — автобус, у поезд яқинлашаётгани ҳақида сигнал берилганига қарамай, кесишмадан ўтишга уринган).

Тўқнашув юз берган вақтда автобусда етти киши бўлган. Қозоғистоннинг Астрахандаги консули Қанат Шеккалиевнинг маълум қилишича, икки қозоғистонлик — ҳайдовчи ва унинг ёрдамчиси фақат тан жароҳати олган, автобусда йўловчи сифатида кетаётган беш ўзбекистонликнинг бари ҳалок бўлган.

Ҳалок бўлган ўзбекистонликларнинг шахси ҳозирча номаълум. Саратовдаги воқеа юзасидан ҳозирча Ўзбекистон Ташқи ишлар вазирлиги ҳам, Фавқулодда вазиятлар вазирлиги ҳам бирор ахборот берганича йўқ.

Эслатиб ўтамиз, 2017 йилнинг 6 октябрида Россиянинг Владимир вилоятида меҳнат муҳожирларини олиб кетаётган автобусни поезд уриб юбориши оқибатида 16 нафар ўзбекистонлик ҳалок бўлган, яна 36 нафари тан жароҳати олган эди. Бундан ташқари, 2017 йил 22 июнь куни Қозоғистоннинг Ақтўбе вилоятида ўзбекистонлик меҳнат муҳожирларини олиб кетаётган автобуснинг ағдарилиши оқибатида 9 ватандош қурбон бўлган, 2018 йилнинг 18 январь куни эса Ақтўбе вилоятида ўзбекистонлик меҳнат муҳожирларини олиб кетаётган автобуснинг ёниб кетиши оқибатида 52 ватандош ҳалок бўлган эди.