АҚШ президенти Дональд Трамп Биринчи жаҳон уруши тугаган кунни нишонлашга бағишланган Франциядаги Жаҳон форуми давомида дунё етакчилари ва ҳукумат раҳбарлари билан учрашувларда кўп нарсага эришилганлигини маълум қилди. Бу ҳақда «РИА Новости» хабар бермоқда.

«Ҳозиргина Франциядан қайтдим. У ерда дунё етакчилари билан учрашувларим давомида кўп нарсага эришилди», — деб ёзди Трамп Twitter’даги саҳифасида.

АҚШ президентининг сўзларига қараганда, у, жумладан, хавфсизлик ва бошқа мамлакатлар билан савдо масаласини кўтарган.

«Биз (АҚШ) бошқа мамлакатларни ҳарбий ҳимоя қилиш харажатларининг катта қисми, юзлаб миллиард долларни тўлаймиз. Бу айнан шу мамлакатлар билан савдода юзлаб миллиардлаб долларни йўқотиш эвазига. Уларга бу вазият ортиқ давом этиши мумкин эмаслигини айтдим… Катта миқдордаги пуллар бошқа мамлакатларни ҳимоя қилиш учун сарфланмоқда, биз эса фақат савдо дефицитлари ва йўқотишларига эга бўлмоқдамиз. Бу жуда бой мамлакатлар Қўшма Штатларга уларни ҳарбий қўллаб-қувватлагани учун ҳақ тўлаши ёки ўзини ўзи ҳимоя қилиши вақти келди…», — дея қўшимча қилди АҚШ президенти.