Тадбиркорлар ва ишбилармонлар ҳаракати — Ўзбекистон Либерал-демократик партияси Наманган вилояти кенгаши томонидан сиёсий партия ташкил этилганининг 15 йиллиги муносабати билан тантанали тадбир ўтказилди, деб ёзади ЎзА.

Тадбирда Ўзбекистон Республикаси Олий Мажлиси Қонунчилик палатаси депутатлари, партия фаоллари, ҳамкор ташкилот ва муассасалар, оммавий ахборот воситалари вакиллари иштирок этди.

Тадбирда қайд этилганидек, тадбиркорлик субъектлари сафи кун сайин кенгайиб, уларнинг ялпи ички маҳсулотдаги улуши ортиб бормоқда. Бу борада партия вилоят, шаҳар ва туман кенгашлари томонидан ишбилармон тадбиркорлар сафини кенгайтириш мақсадида ўтказилаётган турли кўрик-танловлар муҳим аҳамият касб этмоқда. Тадбиркорлик фаолиятини йўлга қўйиш борасида учраётган турли тўсиқ ва муаммолар ўз ўрнида бартараф этиб борилмоқда.

Жумладан, шу кунга қадар халқ депутатлари вилоят Кенгашидаги партия депутатлари томонидан ташкилотлар раҳбарларига 148 та, туман ва шаҳар кенгашлари депутатлари томонидан эса 425 та депутатлик сўрови киритилган. Ушбу мурожаатларнинг аксарияти партия электорати бўлган тадбиркор ва фермерлар томонидан йўллангани жамоатчилик орасида партияга бўлган умид ва ишонч ошиб бораётганидан далолат беради.

Тантанали маросимда туман ва шаҳар кенгашлари раҳбар ва ижроия органларининг самарали фаолиятини таъминлаш, жамоатчилик орасида партия мақсад ва вазифаларини кенг тарғиб қилиш, партия фаоллари ҳамда тарафдорлари сафини янада кенгайтириш мақсадида ўтказилган «ЎзЛиДеП юксак мақсадларга чорлайди» кўрик-танлови ғолиблари, «Энг намунали бошланғич партия ташкилоти», «Халқ депутатлари маҳаллий кенгашларидаги энг фаол депутат» ва «Энг намунали туман(шаҳар) партия ташкилоти» танловининг 1-, 2- ва 3-ўрин соҳибларига партия вилоят кенгашининг фахрий ёрлиқ ва эсдалик совғалари топширилди.