Ўзбекистон Жаҳон банкининг Doing Business бизнес юритиш шароитлари рейтингида «Халқаро савдо-сотиқ» кўрсаткичи бўйича 190 та ўриндан 165-сини эгаллади, деб ёзади Spot. 2017 йилдан буён 5,48 баллга ўсиш кузатилди. Жаҳон банки мутахассислари буни бизнес учун шароитларни енгиллаштирган ислоҳот билан изоҳламоқда.

Яхшиланишга қарамай, Ўзбекистон ҳамон аутсайдерлар қаторида қолмоқда. Масалан, экспорт (чегара ва божхона назорати)га 112 соат кетади. Таққослаш учун, Европа ва Марказий Осиёда ўртача кўрсаткич 22,1 соат, Иқтисодий ҳамкорлик ва ривожланиш ташкилоти мамлакатларида — 12,5 соат кетади. Экспорт қиймати (чегара ва божхона назорати) 278 долларни ташкил этади, бутун минтақада эса бу 157,5 доллар, Иқтисодий ҳамкорлик ва ривожланиш ташкилоти мамлакатларида эса 139,1 долларга тенг.

Барча ҳужжатларни расмийлаштириш учун 96 соат талаб этилади, Евросиёда бу уч марта камроқ — 24,3 соат, ривожланган мамлакатларда эса — 2,4 соат. Ҳужжатларни расмийлаштириш нархи — 292 доллар (минтақада — 97,9 доллар, ривожланган мамлакатларда — 35 доллар).

Импорт учун вақт ҳам экспортники билан деярли бир хил — 111 соат. Яқин қўшниларда бу 21,1 соат, ривожланган мамлакатларда — 8,5 соатга тенг. Импорт нархи — 278 доллар, ҳужжатларни расмийлаштириш учун сарфланадиган вақт — 174 соат, ҳужжатларни расмийлаштириш нархи — 292 доллар.

Ўзбекистон 100 баллдан 49,79 балл тўплади, бу Молдова (92,32), Қирғизистон (80,74), Россия (71,06) ва Қозоғистон (70,36)никидан камдир.

Эслатиб ўтамиз, Жаҳон банки томонидан 31 октябрь куни эълон қилинган Doing Business рейтингида Ўзбекистон икки поғона пастлаб, 76-ўринни эгаллаган эди.