Самарқанд шаҳрида сўнгги икки кун давомида кучли ёмғир ёғиши оқибатида юзага келган сув тошқини бартараф этилди. Самарқанд шаҳар ҳокимлиги ва ободонлаштириш бошқармаси томонидан шаҳардаги 20 та кўчада 300 нафардан ортиқ ободонлаштириш ходимлари ариқлар ва сув тўпланиб қолган жойларни тозалаш ишларини олиб борди. Бу ҳақда «Дарё» мухбири Фарҳод Норбўтаев хабар берди.

«Ёмғир натижасида сув тўпланиб қолган Самарқанд шаҳридаги ‘Ўзбекистон’, ‘Спитамен’, ‘Нарпай’, ‘Фирдавсий’, ‘Мирзо Улуғбек’ ва ‘Маҳмуд Кошғарий’, ‘’Сўзангарон’, ‘Истиқбол’, ‘Зарафшон’, ‘Шаҳробод’ ва ‘Фидокорлар’ каби маҳаллаларидаги 20 та кўчалардаги ариқлар тўлиқ тоззаланди», — деди Самарқанд шаҳар ҳокимлиги коммунал масалалари бўйича раҳбари Феруз Нажмиддинов.

Самарқанд шаҳар ҳокимлиги томонидан ёғингарчилик натижасида ариқларга тўпланиб қолган сувларни бартараф этиш бўйича мурожаат қилган фуқароларга амалий ёрдам кўрсатилиб, юзага келиши мумкин бўлган кўплаб ҳолатларнинг олди олинди.