Ўзбекистонда 1,5 миллиондан ортиқ қозоқ миллатига мансуб фуқаро истиқомат қилмоқда. Бу ҳақда Президент ҳузуридаги Давлат бошқаруви академияси кафедра мудири Мансур Бекмуродов маълум қилди, дея хабар беради «Казинформ».

«Мамлакатда 100 га яқин қозоқ миллий-маданий маркази ва 500 дан ортиқ қозоқ тили ўқитиладиган умумтаълим мактаби мавжуд. Қозоқ тилида кадрлар тайёрланмоқда, ансамбллар, театр фаолият кўрсатмоқда. Қозоқ Ўзбекистонда ўзини ватанидаги каби ҳис этади», — таъкидлади Бекмуродов «Қозоғистон ва Марказий Осиё: этноижтимоий жараёнлар ва этномаданий мулоқот» анжумани йиғилишида.

Бекмуродовга кўра, яқинда ўтказилган социологик тадқиқотлар ўзбек бўлмаган аҳолининг 97 фоизи Ўзбекистонни ватани ҳисоблаши ва титул миллат томонидан ҳеч қандан босим ўтказилмаслигини билдирган.

Эксперт йиғилиш давомида бу йил Қозоғистонда Ўзбекистон йили ўтказилаётгани, келгуси йил эса Ўзбекистонда Қозоғистон йили деб эълон қилинганини эслатиб ўтди.