Жорий йилнинг 12 август куни эрта тонг соат тахминан 05:20 атрофида Ургут тумани «Кулолли» маҳалласи Навоийшоҳ кўчаси 146-уй олдида У.А. исмли шахс ўзи бошқарувидаги Nexia русумли автомобилда қарама-қарши йўналишда ҳаракатланиб кетаётган Ургут тумани «Юқори Торинжак» маҳалласида яшовчи 1989 йилда туғилган фуқаро Шерзод Султоновни уриб юборган. Натижада Шерзод Султонов бошидан тан жароҳати олган. Қизиқ томони шундаки, ҳайдовчи У.А. жабрланувчини шифохонага эмас, балки ўз уйига олиб кетган. Айнан шундан сўнг киши тасаввурига сиғдира олмайдиган воқеалар содир бўлган.
Бош қисмидан тан жароҳати олган Шерзод Султонов ўз вақтида шифохонага олиб борилмаганлиги сабабли орадан 3 кун ўтиб, аниқроғи 15 август куни Республика шошилинч тез тиббий ёрдам маркази Самарқанд вилоят филиалида вафот этган.
Мазкур ҳолат бўйича «Дарё» мухбири Фарҳод Норбўтаев марҳумнинг ота-онаси ва яқинлари билан суҳбатда бўлиб қайтди.
– «Биз ўғлимиз автоҳалокатга учраганини орадан етти соат ўтгандан сўнг хабар топдик», – дейди марҳумнинг отаси Ражаб Султонов. – «Сабаби, автоҳалокатдан сўнг ҳайдовчи ўғлимни шифохонага олиб бормаган. Воқеа содир бўлганидан сўнг 10 дақиқа ўтиб ўзим ўша ердан ўтдим. Ҳайдовчи ўғлимни воқеа жойига ташлаб қочиб кетган тақдирда ҳам ўзим вақтида шифохонага олиб борардим. Автоҳалокат эрта тонгда бўлгани учун кўпчилик кўрмаган. Кўрганлар ҳам у менинг ўғлим эканлигини билишмаган.
Ражаб Султоновнинг маълум қилишича ҳайдовчи У.А. жабрланувчи Шерзод Султоновни уриб кетганидан сўнг уни ўз машинасида уйига олиб борган. У.А. акаси А.А.га машинасида одам уриб юборганлигини, уни шифохонага олиб бориш лозимлигини айтган. Бироқ, А.А. жабрланувчини шифохонага олиб борса ортиқча ташвиш пайдо бўлиши, қолаверса қоғозбозлиг-у, милициябозлик кўпайиб кетишини айтиб, жабрланувчини ўзлари даволашмоқчи бўлишган.
– «Аслида ўғлимни У.А. уриб юборган. Аммо у воқеани акаси А.А.га айтиб берганидан сўнг, акаси уни ишга кетаверишини, масалани ўзи ҳал қилишини айтиб ҳайдовчини бошқа жойга юборган. А.А. эса автоҳалокатга сабабчи бўлган Nexia русумли автомобилни уйга қўйиб, Spark русумли автомобилда ўғлимни бошқа бир уйга олиб борган», — дейди жабрланувчининг онаси Фотима Расулова. – «Шифокорларнинг айтишича, автоҳалокатдан сўнг тўғри шифохонага олиб борганида ўғлим тирик қолиши мумкин экан. Бироқ, улар 5 соатдан кўп вақт давомида ўғлимни ўз уйларида ўзларича даволашга уринган.
Маълум бўлишича, ҳайдовчи У.А. нинг акаси А.А. жабрланувчи Шерзод Султоновни автоҳалокат содир бўлгандан сўнг уйига олиб бориб, турли йўллар билан даволашга ҳаракат қилган. Бироқ, улар кўрсатган ёрдам натижасида жабрланувчининг саломатлигигага ҳеч қандай ўзгариш бўлмаганидан сўнг уни соат тахминан 10:40 атрофида туман марказий шифохонасига олиб боршиган.
8 йилдан буён хусусий стоматология клиникасида тиш ясовчи врач сифатида ишлаб келган Шерзод Султоновнинг 3 нафар фарзанди бўлган. Катта фарзанди шу йил биринчи синфга қадам қўйган бўлса, кичик фарзанди эндигина уч ойлик бўлган.
– «Автоҳалокатдан сўнг ҳайдовчига нисбатан ҳеч қандай чора кўрмади. Ушбу воқеадан 15 кун ўтган бўлса-да У.А. ҳеч нарса бўлмагандек юраверди. Охири Ўзбекистон Республикаси Бош прокуратурасига, Президентнинг вертуал қабулхонасига мурожаат қилдик», – дейди Ражаб Султонов. – «Аммо, масаланинг бошқа томони бор. Ўғлимни 5 соат давомида уйда сақлаб, уни шифохонага олиб бормаган А.А.га нисбатан ҳеч қандай чора кўрилмаяпти. Нега? Ахир, у автоҳалокатга учраган ўғлимни шифохонага олиб бориш ўрнига ўз уйида сақлаб турган-ку?!
Маълум бўлишича, ҳайдовчи У.А.нинг акаси А.А. дори воситалари савдоси билан шуғулланиб келган. У ўз уйида Шерзод Султоновга турли оғриқ қолдирувчи дорилар орқали ёрдам беришга уринган. Бироқ уларнинг беморга қўллаган дори воситалари ҳеч қандай ёрдам бермаганидан сўнг соат 10:40 атрофида туман марказий шифохонасига олиб боришган. Ажабланадиган жиҳати шундаки, А.А шифокорларга беморни автоҳалокатдан эмас, балки уйдаги усталарга ёрдам бераётган вақтда девордан йиқилиб тушди деб айтган.
– «Сентябрь ойининг охири, октябрь ойининг бошларида Ургут туманига келган Халқ демократик партияси раиси Ҳотамжон Кетмоновни тасодифан учратиб қолдим. Президентлик сайловида номзодини қўйгани учун тезда таниб, турмуш ўртоғим билан содир бўлган воқеани айтдим. Биз чамаси 15 дақиқача суҳбатлашдик. Бўлган воқеаларни эшитиб, мазкур ҳолатни тўлиқ назоратга олишини билдириб ўтди. Қолаверса, бу масалани туман ҳокими билан муҳокама қилишини айтиб, туман ҳокимлигига чақирди. Биз туман ҳокимлигига бордик. Аммо аввалига ҳокимликга бизни киритишни истамади. Ҳотамжон Кетмоновнинг талаби билан бизни йиғилишга киришимизни айтганидан сўнг ҳокимлик вакиллари мажлис бўладиган залга бизни киритишга мажбур бўлишди», – дейди Ш.Султоновнинг турмуш ўртоғи Мўмина Расулова.
Айни пайтда Самарқанд вилоят Ички ишлар бошқармаси ҳузуридаги Тергов бошқармаси томонидан 2018 йилнинг 7 сентябрь куни ҳайдовчи У.А.га нисбатан Ўзбекистон Республикаси Жиноят Кодексининг 266-моддаси 2-қисми билан айблов эълон қилиниб, эҳтиёт чораси сифатида «қамоқ» чораси қўлланилган. Ҳозирда мазкур ҳолат бўйича дастлабки тергов ҳаракатлари давом эттирилмоқда.
Автоҳалокат натижасида бошидан тан жароҳати олиб, вафот этган Шерзод Султонов билан боғлиқ жиноят иши нега ортга сурилиб, марҳумнинг яқинлари республикага қилган мурожаатидан сўнг жиддий тарзда ўрганишга киришилаётганлигини тушуниш қийин.
Ургут туман миқёсида ушбу жиноятни ўз вақтида кўришни ортга сурилганлигининг сабаби нимада?
Қолаверса, автоҳалокатга учраган одамни шифохонага олиб бормай, ўз уйида даволашга уринган А.А.га нисбаттан қандай чора кўрилади?
«Дарё» мазкур ҳолат юзасидан воқеалар ривожини кузатиб боради.
Изоҳ (0)