Россия келгуси йилда муҳожирлар учун квоталарни оширишни режалаштирмоқда

Россия Меҳнат вазирлиги 2019 йилда муҳожирлар учун квотани 144 минг кишигача оширишни таклиф қилди, деб ёзади «Podrobno.uz».

«Меҳнат вазирлиги келгуси йилда Россияда ишлаш учун хорижликларни жалб этиш квотасини 144 минг кишигача оширишни таклиф қилди. Бу мазкур йилги эҳтиёждан тўрт минг кишига кўпдир», — дейилади ҳукумат қарори лойиҳасига изоҳ берувчи қайдда.

Меҳнат вазирлиги хорижий капитал иштирокидаги инвестиция лойиҳаларини амалга ошириш, чет элдан келтирилган технологик қурилмаларни қўллаш, қурилишда замонавий технологиялардан фойдаланиш ва Россияда зарур малакали кадрларнинг йўқлиги хорижий ишчиларни Россияга жалб этишнинг асосий сабаби эканлигини маълум қилди.

Эслатиб ўтамиз, 2018 йилнинг биринчи ярмида миллионга яқин Ўзбекистон фуқароси Россияга ишлаш учун кетган.