Тошкентда 25 октябрь куни «Кўчмас мулкни рўйхатдан ўтказиш ва кадастр тизимларини модернизациялаш» лойиҳасига бағишланган халқаро семинар ўтказилди. Бу ҳақда ЎзА хабар берди.
Ўзбекистон Республикаси Ер ресурслари, геодезия, картография ва давлат кадастри давлат қўмитаси Жаҳон банки билан ҳамкорликда ташкил этган анжуманда мазкур лойиҳанинг мақсадлари, уни амалга оширишдан кўриладиган фойда ва шу кунгача эришилган натижалар ҳақида сўз борди.
Семинарда тегишли вазирлик ва идоралар, маҳаллий ҳокимият органлари, жамоат ташкилотлари, халқаро молия институтлари, банклар, суғурта компаниялари, нотариал идоралар, олий таълим муассасалари, геодезия, баҳолаш, риэлторлик компаниялари вакиллари, турар жой фонди қурувчилари иштирок этди.
Ўзбекистон Республикаси Ер ресурслари, геодезия, картография ва давлат кадастри давлат қўмитаси раисининг ўринбосари Ш.Ҳабибуллаев, Жаҳон банкининг ер сиёсати бўйича катта мутахассиси C.Белл, лойиҳанинг халқаро маслаҳатчилари А.Финне (Финляндия), Р.Загретдинов (Россия) ва бошқалар кадастр ҳисобини юритиш ва кўчмас мулкка эгалик ҳуқуқини давлат рўйхатидан ўтказиш тизимига замонавий технологияларни татбиқ этиш, соҳада ахборот ресуслари ва тизимларининг жадал ривожланишини таъминлаш, кўчмас мулк кадастри ва рўйхатга олишнинг тўлиқ рақамли тизимини яратиш, шунингдек, лойиҳани татбиқ этиш натижасида кутилаётган натижалар ҳақида маълумот берди.
«Кўчмас мулкни рўйхатдан ўтказиш ва кадастр тизимларини модернизациялаш» инвестиция лойиҳаси 2016 йил Ер ресурслари, геодезия, картография ва давлат кадастри давлат қўмитаси ҳамда Жаҳон банки ўртасида имзоланган келишув асосида амалга оширилмоқда.
Умумий қиймати 35,77 миллион доллар бўлган мазкур лойиҳага Жаҳон банки 20 миллион доллар кредит ажратган. 2016—2021 йилларга мўлжалланган лойиҳа тендер танловида ғолиб чиққан Швециянинг «Swedesurvey» компанияси билан ҳамкорликда амалга оширилмоқда.
Ушбу лойиҳа кадастр ва кўчмас мулкни рўйхатга олишнинг мавжуд «қоғозли» тизимини геоахборот ва веб-технологияларни электрон ҳукумат базавий платформасининг таркибий қисми сифатида қўллаш, замонавий кадастр ва кўчмас мулкни рўйхатдан ўтказиш интеграллашган ахборот тизимини яратиш орқали тизимни модернизация қилишни назарда тутади. Лойиҳа кўчмас мулк реестри ва кадастри тизимини яратиш, кўчмас мулкни рўйхатга олиш ва кадастр бўйича маълумотларни ишлаб чиқиш, мавжуд маълумотлардан фойдаланиш, мижозларга хизмат кўрсатиш каби таркибий қисмлардан иборат.
Семинарда мазкур йўналишларда олиб борилаётган ишлар, кўчмас мулкни рўйхатга олиш ва кадастр тизимини модернизация қилиш, тизимга ахборот технологияларини жорий этишда эришилаётган натижалар ҳақида тақдимотлар намойиш этилди, мутахассисларнинг маърузалари тингланди.
Тадбир доирасида «Давергеодезкадастр» қўмитаси томонидан лойиҳа мазмун-моҳиятини аҳолига кенг тарғиб этиш мақсадида журналистлар ўртасида махсус танлов эълон қилинди.
Изоҳ (0)