Шарқий ҳарбий округига қарашли «Десантчилар» ҳарбий қисмида Фарғона вилояти ёшлари иштирокида «Уч авлод» номи остида учрашув бўлиб ўтди. Бу ҳақда Мудофаа вазирлиги матбуот хизмати «Дарё»га маълум қилди.
«Маънавий юксалиш ва ватанпарварлик куни» муносабати билан ташкил этилган тадбирда Шарқий ҳарбий округи қўшинлари қўмондонлиги, Фарғона «Темурбеклар мактаби» ҳамда «Турон-патриот» махсус мактабининг ўқувчилари, шунингдек, вилоят фахрийлари иштирок этди.
Учрашув давомида Ўзбекистон Президентининг 2018 йил 4 августдаги 3898-сон қарорининг мазмун-моҳияти, унинг ижроси юзасидан амалга оширилаётган ишлар юзасидан маърузалар ўқилди.
Тадбир давомида ёшлар учун қурол-аслаҳалар кўргазмаси ташкил этилиб, уларга Ўзбекистон Республикаси Қуролли Кучларида фойдаланиб келинаётган замонавий техникалар ҳақида батафсил маълумотлар берилди. Кўнгилли ёшлар парашютлар ёрдамида десантчиларнинг махсус машқларини бажариб кўришди.
Учрашув якунида меҳмонлар ҳарбий қисм ошхонасида ҳарбий хизматчиларнинг таомномаси билан танишди.
