Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаментининг Навоий вилояти Конимех тумани бўлими ходимлари томонидан фуқаролар аризаси юзасидан махсус тадбир ўтказилди, деб хабар беради ЎзА.
Тадбирда Зарафшон шаҳрида яшовчи, вақтинча ишсиз И.Ў. 37 нафар фуқаронинг ишончига кириб, улардан 4 миллион сўмдан, жами 148 миллион сўм миқдордаги пулларни фирибгарлик йўли билан қўлга киритиб, ўз эҳтиёжи учун ишлатиб юборгани масаласи кўриб чиқилди.
«Ишбилармон» 37 нафар фуқарони Навоий кон-металлургия комбинатида ишловчи танишлари орқали комбинатга қарашли конлардан биридаги заводга турли лавозимларга ишга жойлаштиришни ваъда қилган.
Шунингдек, фуқаро И.Ў. ушбу пул маблағларини ўзи орқали комбинатнинг мансабдор шахсларига пора тариқасида бермоқчи бўлгани аниқланган.
Мазкур ҳолат юзасидан И.Ў.га нисбатан Ўзбекистон Республикаси жиноят кодексининг тегишли моддалари билан жиноят иши қўзғатилган.
Изоҳ (0)