Халқаро олимпия қўмитаси (ХОҚ) AIBA’нинг вақтинчалик президенти Ғафур Раҳимовга 2018 йилги ўсмирлар Олимпиадасига ташриф буюришни тақиқлади. Бу ҳақда Inside The Games нашри хабар тарқатди, деб ёзади Turon24 АА.
Қайд этилишича, Халқаро олимпия қўмитаси бош директори Кристоф Де Кеппер AIBA’га аъзо бўлган миллий федерацияларга хат ёзган ва унда Раҳимов бўлажак мусобақа учун аккредитациядан ўтказилмаслигини маълум қилган. Шунингдек, қўмита AIBA билан иш юзасидан алоқалардан ташқари, барча ҳамкорликни музлатиб қўйган.
Яқинда эса Ғофур Раҳимов AIBA президентлиги учун ягона номзодга айланганди. Боиси, қозоғистонлик иккинчи номзод Серик Конакбоев ўз номзодини қўллаш бўйича етарлича имзога эга бўла олмаганди.
Таъкидлаш жоиз, Халқаро олимпия қўмитаси (ХОҚ) Раҳимовни президентликка номзодини кўрсатмаслигини сўраб огоҳлантирганди. Шунингдек, Раҳимов AIBA президентлигига сайланса, Токио—2020 Олимпиада дастурида боксни сақлаб қолиш бўйича ХОҚнинг қарорига таъсир ўтказиши мумкинлиги ҳам кўрсатиб ўтилган.
АҚШ молия вазирлигининг хорижий активлар устидан назорат қилиш бўйича департаменти Раҳимовни жиноятчилардан бири сифатида санкциялар рўйхатига киритган. Шунингдек, АҚШ молия вазирлиги Раҳимовнинг АҚШ долларида исталган молиявий операцияларни амалга ошириш имкониятига тақиқ қўйган. Ўз навбатида, Раҳимов ўзига қўйилган барча айбловларни рад этган эди.
Маълумот учун, ўсмирлар ўртасидаги III ёзги Олимпиада ўйинлари 6—18 октябрь кунлари Аргентина пойтахти Буэнос-Айресда бўлиб ўтади.
Изоҳ (0)