Инновацион ривожланиш вазирлиги «Ёш олим» республика танловини эълон қилди. Бу ҳақда «Дарё»га вазирлик матбуот хизмати маълум қилди.
Танловда илмий даражаси, унвони, мансаби ва иш жойидан қатъий назар, 35 ёшгача бўлган ёш олимлар, ўқитувчилар, илмий ходимлар, таянч докторантлар ва докторантлар, мустақил изланувчилар ва магистрантлар иштирок этиши мумкин.
Танлов қуйидаги фан йўналишлари бўйича ўтказилади:
Табиий фанлар;
Техника фанлари;
Қишлоқ хўжалиги;
Ижтимоий-гуманитар фанлар.
Танловга ёш олимларнинг илмий изланишлари ва уларнинг натижалари аниқ акс этган 2 варақдан иборат аннотацияси электрон шаклда қабул қилинади. Маълумотнома номзод томонидан фаннинг муайян соҳаси ривожига қўшилган ҳисса, шахсий илмий ютуқлар ва халқаро аҳамиятга молик натижалар билан бойитилганлиги, маҳаллий ва хорижий аҳамиятдаги илмий журналларда нашр қилинган илмий мақолалари, монография ва бошқа нашрлари, шунингдек, илмий-ташкилий фаолияти ҳақидаги давлат ва рус тилларида тайёрланиши керак.
Маълумотнома ОТМ, ИТИ раҳбарлари томонидан имзоланган йўлланма хати билан жўнатилади. Ушбу хатда номзод томонидан амалга оширилаётган тадқиқот мавзуси, бажарилиши ва ундан кутилаётган натижалар республика ижтимоий-иқтисодий тараққиёти учун муҳимлиги асосланган бўлиши лозим.
Электрон рўйхатдан ўтказилган лойиҳалар Инновацион ривожланиш вазирлигида 2018 йилнинг 20-октябрига қадар қабул қилинади. Танлов ғолиблари жорий йилнинг 22—26 октябрь кунлари Тошкент шаҳрида бўлиб ўтадиган Inno Wеек халқаро инновацион ғоялар ҳафталигида эълон қилинади. Улар учун пул мукофотлари кўзда тутилган.
Изоҳ (0)