Жисмоний тарбия ва спорт вазири аҳоли билан бирга бадантарбия машқларини бажарди (фото)
Қорақалпоғистон Республикаси жисмоний тарбия ва спортни оммалаштириш бўйича намунавий ҳудуд сифатида танлаб олинган. Ҳудудда турли спорт тадбирлари, мусобақалар ва тарғибот ишлари самарадорлиги тажриба-синовдан ўтказилмоқда, деб хабар беради Жисмоний тарбия ва спорт вазирлиги матбуот хизмати.
Чора-тадбирлар доирасида Ўзбекистан Ёшлар иттифоқи ҳамда Жисмоний тарбия ва спорт вазирлиги Қорақалпоғистоннинг барча туманларида «Ёшлар спорт ҳафталиги»ни намуна тарзида ташкил этди. Ҳафталик давомида спортнинг шахмат-шашка, бадиий гимнастика, мини-футбол, волейбол, стол тенниси, бадминтон турлари бўйича ўйинлар ташкил этилиб, уларда 200 минг нафарга яқин ёшлар иштирок этди.
Тадбирларда Жисмоний тарбия ва спорт вазири Дилмурод Набиев ҳам иштирок этиб, уларда иштирок этувчилар қамровини кенгайтириш учун самарали механизмлар қўлланилиши лозимлиги, мазкур ҳудудда тўпланган тажриба асосида республиканинг барча ҳудудларида ҳафталикларни ташкил этилишини таъкидлади.
Вазир республикада аҳоли учун мавжуд спорт иншоотларидан исталган пайти фойдаланиш имкониятининг яратилиш ҳолатини ҳам ўрганди. Жумладан, Нукус шаҳридаги спорт иншоотларида барча ёшдаги инсонлар учун ташкил этилган бадантарбия машқларини кузатди ва ўзи ҳам улар билан биргаликда бажарди.
