Тошкент вилоятида яроқсиз автомобиллар рўйхатдан чиқарилмоқда
Тошкент вилоят ИИБ ЙҲХ бошқармаси томонидан Вазирлар Маҳкамасининг 19 май кунидаги 377-сонли «Ўзбекистон Республикаси Йўл хавфсизлигини таъминлаш тизимини янада такомиллаштириш чора-тадбирлари тўғрисида»ги қарори ижросини таъминлаш мақсадида, бир неча йиллардан буён мажбурий техник кўрикка тақдим этилмасдан, мулк эгаларининг хонадонларида фойдаланиш учун яроқсиз ҳолда сақланиб келинаётган транспорт воситаларини ўрнатилган тартибда ДЙҲХ хизмати рўйхатидан ўчириш ишлари олиб борилмоқда. Бу ҳақда Тошкент вилояти ИИБ матбуот хизмати хабар бермоқда.
Ўтказилаётган тушунтиришлар ишлари давомида айрим фуқаролар томонидан транспорт воситаси фойдаланиш учун умуман яроқсиз ҳолга келган бўлса-да, «раҳматлик бувам ҳайдаган машинани қандай йўқ қиламан» ёки «бувамдан қолган ёдгорлик» каби фикрлар билдирилаётган бўлса-да, ходимлар томонидан мазкур қарорнинг мазмун-моҳияти, унинг мақсади ҳақида тушунтиришлар берилмоқда.
Хусусан, шу даврга қадар жисмоний шахсларга тегишли бўлиб, фойдаланиш учун яроқсиз ҳолга келган 897 та транспорт воситаси яроқсизлиги учун ДЙҲХ хизмати рўйхатидан ўчирилди, қолаверса жорий йилнинг 28 сентябрь «Йўл ҳаракати хавфсизлиги тарғиботи куни»да ҳам яроқсиз ҳолга келиб қолган 13 та транспорт воситаси аниқланиб, тегишли ҳужжатлар расмийлаштирилди.
Тошкент вилоят ИИБ ЙҲХ бошқармаси томонидан бу борадаги тадбирлар давом эттирилмоқда.
