Абдулсаттор Эдхий — бепул касалхоналар, бошпаналар қуриб, ўзи ҳаётини 2 та костюм билан ўтказган покистонлик

БМТ Facebook’даги саҳифасида тарихда энг кўп одамларга ёрдам берган Абдулсаттор Эдхий ҳақида маълумот берди.

У Британия Ҳиндистонида Гужарат шаҳрида туғилган. 11 ёшида онаси инсульт туфайли фалаж бўлиб қолади ва унга ўзи ғамхўрлик қила бошлайди. 19 ёшга тўлганида онасидан айрилади, шунда у ҳаётини хасталар, қариялар ва бечораларга ёрдам беришга бағишлашга қарор қилади. Покистонда камбағаллар учун ҳеч қандай ижтимоий таъминот йўқ эди. Эдхий бепул касалхона қуришга пул йиғиш учун кўчада тиланчилик қила бошлайди.

Ўшандан буён унинг жамғармаси 20 минг нафар қаровсиз болаларни қутқарди, 50 минг етимга ёрдам берди, 40 минг ҳамширани ўқитди. Эдхий бепул қариялар ва болалар уйлари, касалхоналар, аёллар учун бошпаналар ва гиёҳвандлар учун реабилитация марказлари тармоғи билан бир қаторда, дунёдаги энг йирик тез ёрдам хизматини яратди.

Умр бўйи у иккита костюм кийган. У ҳеч қачон ўз жамғармасидан маош олмаган. Эдхий: «Ҳашамат учун яшашдан тўхтаганингизда, ҳаётнинг мазмунини тушуна бошлайсиз», — деган экан. 2009 йилда у ЮНЕСКОнинг Манажит Сингх мукофотига сазовор бўлган.

Эдхий 2016 йил 8 июлда 88 ёшида вафот этган. Унинг сўнгги васияти ўз органларини эҳтиёжмандларга бериш бўлган.