Марғилон шаҳрида бўлиб ўтадиган «Атлас байрами» фестивали 11 сентябрь куни очилади. Бу ҳақда «Дарё» мухбири Азизжон Эрматов хабар бермоқда.
«Атлас байрами» фестивали УNESCО ишлари бўйича Ўзбекистон Республикаси Миллий комиссияси, Маданият вазирлиги, Бадиий академия, Туризмни ривожлантириш давлат қўмитаси, «Ҳунарманд» уюшмаси, УNESCЎнинг Ўзбекистондаги ваколатхонаси ва Фарғона вилояти ҳокимлиги томонидан ташкил этилмоқда.
Фестиваль анъанавий маҳорат дарслари билан бошланади. Тренинг машғулотлари миллий матолардан фойдаланган ҳолда либослар дизайнини яратиш ва анъанавий ҳунармандчиликни ривожлантириш, атлас ва адрасларга безак бериш, ипак матоларга нақш ва гуллар босиш, ўтган асрларда юртимизда машҳур бўлган газламалар тарихини ўрганишга бағишланади.
Машғулотлар давомида «Ипак йўли интерфаол харитаси» лойиҳаси доирасида халқаро мутахассислар учрашуви ташкил этилиб, замонавий технологиялардан унумли ва самарали фойдаланиш, миллий маҳсулотларни кенг тарғиб этиш, жаҳон бозорига чиқиш, ноодатий буюмлар яратиш орқали тадбиркорликни ривожлантириш масалаларига эътибор қаратилади.
Фестиваль доирасида халқаро анжуман, Ўзбекистон ҳунармандчилик кўргазмаси, моделерлар шоу-дефилеси, концертлар, кураш мусобақаси, аскиячилар ва дорбозлар чиқишлари, «Девзира» ош танлови ўтказилади.
Байрамда фолклор ансамбллари, халқ ижрочиларининг дастурлари, дорбозлар ва қўғирчоқ театрлари томошалари ҳам намойиш этилади.
Изоҳ (0)