Ўзбекистонда жорий йил пахта мавсумида қўлда терилган бир килограм пахта хом ашёси учун 650 сўм ҳақ тўланади. Бу ҳақда бугун, 5 сентябрь куни Ўзбекистон Бош вазири раислигида ўтказилган йиғилишда маълум қилинди, деб хабар беради «Дарё» мухбири Севара Нишонова.
Пахта хом ашёси машинада терилганда бир тонна учун 400 минг сўм, қўлда терилган бир килограмм учун биринчи босқичда контрактация шартномаси 60 фоизгача бажарилгунга қадар 650 сўм, иккинчи босқичда – 60 фоиздан 80 фоизгача 850 сўм, учинчи босқичда – 80 фоиздан ортганда 1000 сўмдан иш ҳақи тўлаш белгиланди.
Жорий йилда Сирдарё, Жиззах ва Тошкент вилоятларида жами 27 минг 393 гектар майдондаги пахта725 та машина ёрдамида териб олинади. 2017 йилда машина терими – 260 минг сўм, қўл терими – 450 сўм, 500 сўм ва 700 сўм белгиланган.
Бундан ташқари, аҳоли кам бўлган ҳудудлар учун алоҳида тартиб белгиланиб, Жиззах, Сирдарё, Тошкент вилоятларининг барча туманларида, шунингдек Қашқадарё вилоятининг Косон, Муборак, Нишон ва Касби, Сурхондарё вилоятининг Қизириқ ва Музработ туманларида Молия вазирлиги ҳузуридаги қишлоқ хўжалигини давлат томонидан қўллаб-қувватлаш жамғармаси томонидан қўлда терилган бир килограмм пахта учун қўшимча 150 сўм, озиқ-овқат харажатларига 150 сўм, жами 300 сўм устама ҳақи тўланадиган бўлди.
Бунинг учун, жамғармадан 246 миллиард 404 миллион сўм ажратилади. Шунингдек, биринчи марта теримчилардан пахта теримидан оладиган даромадидан пенсия жамғармасига (8 фоиз) суғурта бадали ушлаб қолинмайди. Бунинг ҳисобига 177 миллиард 414 милион сўм маблағ теримчилар ихтиёрида қолади.
Изоҳ (0)