Индонезиянинг Жакарта ҳамда Палембанг шаҳарларида давом этаётган XVIII ёзги Осиё ўйинлари бугун якунига етади. Хўш, Ўзбекистон ҳисобида қанча медаль бор? Бу галги мусобақа аввалгиларидан нимаси билан фарқ қилди? Медальлар борасидаги натижалар ўзгардими?
XVIII Осиё ўйинларига 331 нафар спортчи билан келган Ўзбекистон делегацияси ҳисобида ҳозирча 57 та медаль мавжуд. Шулардан 15 таси олтин, 19 таси кумуш, 23 таси эса бронза медаллари. Умумий рейтингда эса делегация 7-ўринни эгаллаб турибди.
Ўзбекистон шу вақтга қадар 6 та Осиё ўйинларида қатнашган. Медаль жамғариш бўйича Гуангжоу—2010 мусобақаси ўзбекистонлик спортчилар учун омадли келганди—жами 56 та медаль. Кўриб турганингиздек, медаллар сони бўйича Ўзбекистоннинг энг яхши натижаси янгиланди. Ҳозирнинг ўзида 57 та медаль! Олтин медаль борасида Пусан—2002 мусобақаси пешқадам бўлиб турганди. Ўшанда ўзбекистонлик спортчилар ўз ҳисобларига 15 та олтин медални ёзиб қўйишган. Ҳозирнинг ўзида бу кўрсаткич ҳам такрорланди. Яъни спортчилар сўнгги кун мусобақаларига қадар 15 та олдин медални ўзлариники қилишга улгурди.
Бугун ўзбекистонлик 7 нафар боксчининг финал жангларида иштирок этиши ҳисобга олинадиган бўлса, катта эҳтимол билан олтин жамғариш борасидаги кўрсаткич ҳам медаль жамғариш бораси янги рекордлар ўрнатилади.
Умумжамоа ҳисобида 5-ўринни эгаллаш учун эса Эрон билан кураш кетмоқда. Уларнинг ҳисобида ҳозирнинг ўзида 19 та олтин медали мавжуд. Қуйида Ўзбекистон термасининг 6 та Осиё ўйинларидаги иштироки билан танишишингиз мумкин:
- Ҳиросима—1994: 11 та олтин, 12 та кумуш, 19 та бронза. Жами 42 та медаль. Умумжамоа ҳисобида 5-ўрин.
- Бангкок—1998: 6 та олтин, 22 та кумуш, 12 та бронза. Жами 40 та медаль. Умумжамоа ҳисобида 10-ўрин.
- Пусан—2002: 15 та олтин, 12 та кумуш, 24 та бронза. Жами 51 та медаль. Умумжамоа ҳисобида 5-ўрин.
- Доҳа—2006: 11 та олтин, 14 та кумуш, 15 та бронза. Жами 40 та медаль. Умумжамоа ҳисобида 7-ўрин.
- Гуангжоу—2010: 11 та олтин, 22 та кумуш, 23 та бронза. Жами 56 та медаль. Умумжамоа ҳисобида 8-ўрин.
- Инчеон—2014: 9 та олтин, 14 та кумуш, 22 та бронза. Жами 45 та медаль. Умумжамоа ҳисобида 11-ўрин.
- Жакарта-Палембанг—2018: 15 та олтин, 19 та кумуш, 23 та бронза. Жами 57 та медаль. Умумжамоа ҳисобида ҳозирча 7-ўрин...
Изоҳ (0)