АҚШ Федерал қидирув бюроси директори ўринбосари Дэвид Боудич бошчилигидаги делегация Ўзбекистонга ташрифи доирасида 28 август куни Ўзбекистон бош прокурори Отабек Муродов томонидан қабул қилинди. Бош прокуратура матбуот хизмати ахборотида қайд этилишича, учрашувда АҚШ элчиси Памела Спратлен ҳам қатнашган.
Тадбир иштирокчилари ўзаро ҳамкорликнинг изчил ривожланиб бораётганини таъкидлади. Ҳамкорликнинг илк босқичи сифатида Ўзбекистон Бош прокуратураси ва ФҚБ ўртасида 2017 йил 4 декабрда ҳамкорлик меморандуми имзоланганлиги қайд этилди. ФҚБ делегациясининг Ўзбекистонга ташрифи ҳуқуқий соҳадаги ҳамкорликни янада чуқурлаштириш учун навбатдаги босқич бўлиб хизмат қилиши таъкидланди.
Америкалик хамкорларга Ўзбекистон Президенти Шавкат Мирзиёевнинг бевосита бошчилигида амалга оширилаётган жамият ва давлатнинг барча соҳаларини қамраб олган ислоҳотлар ҳақида, шу жумладан прокуратура органларининг ислоҳотларнинг самарали амалга оширилишидаги роли, шунингдек прокуратуранинг янги вазифалари ва фаолиятининг устувор йўналишлари ҳақида маълумот берилди.
Шунингдек, делегация аъзолари Бош прокуратура академияси ва ахборот-таҳлил мультимедиа маркази фаолияти билан ҳам танишди.
Томонлар терроризм, экстремизм, сепаратизм, гиёҳванд воситалар айланмаси, одам савдоси ва бошқа трансмиллий жиноятларга қарши курашиш, шунингдек, жиноят ишларини тергов қилишда ҳуқуқий ёрдам кўрсатиш тартибини соддалаштириш, прокуратура органлари ходимларини ўқитиш ва қайта тайёрлаш бўйича халқаро ҳамкорликни кучайтириш масалаларини муҳокама қилди.
Учрашув дўстона ва самимий руҳда бўлиб ўтди. Томонлар ўзаро фикр алмашиб, келгусида конструктив ҳамкорликни ривожлантириш истагини билдирди.
Изоҳ (0)