Ўзбекистон Республикаси Президенти Шавкат Мирзиёев 2017 йил 28 декабрь куни «2018 йилда расмий саналарни нишонлаш даврида қўшимча ишланмайдиган кунларни белгилаш ва дам олиш кунларини кўчириш тўғрисида»ги фармони асосида мамлакатда илк бор йил давомида байрам кунлари дам олиши олдиндан белгилаб қўйилган эди.
Бироқ, сўнгги маълумотларга кўра, Самарқанд вилоятида 31 август куни ҳам ташкилотларда иш куни ҳисобланади. «Дарё» мухбири Фарҳод Норбўтаевнинг маълум қилишича 31 август куни вилоятдаги айрим ташкилотлар ҳар доимгидек ўз фаолиятини давом эттирмоқда.
Хусусан, Ёшлар иттифоқининг Самарқанд вилоят бўлимида ҳам бугун иш куни.
Олинган маълумотларга кўра, вилоят ҳокимлигидаги айрим ходимларнинг талаби асосида Иттифоқ ёшлари бугун ҳам ишга жалб қилинган. Улар бугуннинг ўзидаёқ фуқаролардан келиб тушган мурожаатларни кейинги ойга қолдирмасдан ёпиши лозим экан.
Маълумотларга кўра, катта эҳтимол билан 1 сентябрь куни ҳам вилоятда иш куни бўлиши мумкин. Ёки 1 сентябрь куни бир кунлик дам эълон қилиниб, ташкилотлар 2 сентябрдан яна иш фаолиятини давом эттириши эҳтимоли бор.
Қизиқ, мустақиллик байрамида дам олиш бир йил олдин маълум қилинган бўлса нега вилоят ҳокимлиги мутасадди вакиллари дам олиш кунини ҳам иш куни сифатида қарамоқда?
Ахир президент томонидан имзоланган қарорга кўра фуқароларнинг расмий саналарни нишонлаш даврида тўлиқ дам олиши учун қўшимча шарт-шароитлар яратиш ва дам олиш, байрам кунларидан оқилона фойдаланиши, шунингдек, ички туризмни янада ривожлантириш эканлиги алоҳида белгилаб қўйилган-ку? Ёки Самарқанд вилоят ҳокимлигида ҳамон бюрократик руҳда фаолият юритувчи ходимлар ҳам борми?
Маълумот учун Мустақиллик байрами — 1 сентябрь арафасида дам олиш қуйидагича бўлади:
Ҳафтада 5 кун ишловчиларга (кетма-кет 5 кун дам олиш):
31 август, жума – қўшимча дам олиш куни;
1 сентябрь, шанба — Мустақиллик байрами;
2 сентябрь, якшанба — дам олиш куни;
3 сентябрь, душанба — кўчирилган дам олиш куни;
4 сентябрь, сешанба — кўчирилган дам олиш куни.
Изоҳ (0)