Автомобиллар «тонировка»сидан 5 кун ичида давлат бюджетига 1 миллиарддан ортиқ пул тушди

Машина ойналарини қорайтириш пуллик бўлганини эшитганлар унинг қимматлигидан нолиган эди. Бугунги кунда машина ойналари учун 16 миллиондан ортиқ сўмни аямайдиганлар топилмоқда, деб ёзади ЎзА.

Тошкент шаҳар ИИББ, ЙҲХ маълумотларига кўра жорий йилнинг 23—28 август кунларида 77 киши машина ойналарини тонировка қилдирган бўлиб, уларнинг 30 нафари юридик шахсдир. Ушбу тўловлардан давлат бюджетига жами 1 443 069 000 сўм тушган.

Эслатиб ўтамиз, автомобиль ойналарини қорайтириш учун қўйилган нархлар қуйидагича белгиланган:

жисмоний шахсларга энг кам иш ҳақининг 90 баравари (16 587 000 сўм);

юридик шахсларга энг кам иш ҳақининг 120 баравари (22 116 000 сўм);

хорижий давлатлар юридик шахсларига энг кам иш ҳақининг 140 баравари (25 802 000 сўм).

Ўзбекистонга вақтинча кириши ва транзит ҳаракатланиши учун 15 АҚШ доллари миқдорида йиғим ундирилади.