«Реал Мадрид» «Лион» ҳужумчисини сотиб оладиган бўлди
Франциянинг «Лион» клуби ҳужумчиси Мариано Диас Мадриднинг «Реал» жамоасига қайтадиган бўлди.
Онда Cеро маълумотига кўра, «Қироллик клуби» 25 ёшли Диас билан беш йиллик шартнома тузади. «Реал» бош мураббийи Хулен Лопетеги Мариано билан шахсан учрашиб, унинг Испанияга қайтиш имкониятларини муҳокама қилган.
Аввалроқ Андалусиянинг «Севилья» жамоаси ҳужумчи билан келишувга эришгани хабар берилганди. Аммо мадридликлар Диасни «Лион»га қайта сотиб олиш ҳуқуқи билан қўйиб юборгани маълум бўлди. Доминиканлик футболчининг «Реал»га қайтиши 20 миллион еврога тушади.
Маълумот учун Диас «Реал» сафида 2012—2017 йиллар оралиғида ҳаракат қилган. 2017/18 йилги мавсум аввалида эса «Лион»га кўчиб ўтганди. Футболчи ўтган мавсум жамоаси сафида Франция чемпионатининг 34 ўйинида қатнашиб, 18 та гол уришга эришди.
