Ўзбекистонда атроф-муҳитга таъсирни баҳолаш тизимини жорий этиш масаласи муҳокама қилинмоқда

Wyndham Tashkent меҳмонхонасида Ўзбекистонда атроф-муҳитга таъсирни баҳолаш тизимини жорий этиш аҳамиятига бағишланган семинар ўз ишини бошлади. Бу ҳақда ЎзА хабар бермоқда.

Экология ва атроф-муҳитни муҳофаза қилиш давлат қўмитаси, Марказий Осиё минтақавий экология марказининг мамлакатдаги филиали, БМТ Европа иқтисодий комиссияси ва Европада хавфсизлик ва ҳамкорлик ташкилотининг мамлакатимиздаги лойиҳалари координатори (ЕХҲТ) ҳамкорлигида ташкил этилган тадбирда Олий Мажлис Сенати, Қонунчилик палатаси депутатлари, тегишли вазирлик ва идоралар мутахассислари, нодавлат ва нотижорат ташкилотлар вакиллари, олий ўқув юртларининг профессор ва ўқитувчилари иштирок этмоқда.

Тадбир очилишида Экология ва атроф-муҳитни муҳофаза қилиш давлат қўмитаси раиси ўринбосари Ў. Ўтаев, Марказий Осиё минтақавий экология марказининг мамлакатимиздаги филиали директори Ш. Умарова, БМТ Европа иқтисодиёт комиссияси атроф-муҳит масалалари бўйича ҳудудий маслаҳатчиси С. Раднаарагчаа, Европада хавфсизлик ва ҳамкорлик ташкилотининг мамлакатимиздаги лойиҳалари координатори Ж. Макгрегор ва бошқалар сўзга чиқиб, атроф-табиий муҳитга кўрсатилаётган антропоген таъсирни камайтиришда экологик хавфсизликни таъминловчи комплекс чораларни қабул қилиш ва уларнинг амалий аҳамият ҳақида тўхталиб ўтди.

Семинар эртага ҳам ўз ишини давом эттиради.