Самарқандда автомашинага яшириб олиб ўтилаётган тамаки маҳсулотлари ушлаб қолинди

«Жартепа» чегара божхона пости ходимлари хорижий давлатда ишлаб чиқарилган, Ўзбекистон Республикаси акциз маркаси билан маркаланмаган тамаки маҳсулотларини мамлакатга ноқонуний олиб ўтиш ҳолатларига чек қўйди. Бу ҳақида «Дарё» мухбири Фарҳод Норбўтаев хабар бермоқда.

Ўзбекистон Республикаси фуқароси А.Қ. қўшни давлатдан Ўзбекистон Республикаси аксиз маркаси билан маркаланмаган, қиймати 1 миллион 335 минг сўмлик Parliament, Senator, Esse, Mond ва LD номли сигаретларни божхона чегараси орқали яшириб олиб ўтишни ният қилган.

Божхона назоратидан ўтаётган фуқаро А.Қ.дан ёнида, қўл юкларида ҳамда унинг бошқарувидаги Damas русумли шахсий автомашинасида Ўзбекистон Республикасига олиб кирилиши тақиқланган ёки миқдорий чекланган товарлар бор-йўқлиги божхоначилар томонидан оғзаки равишда сўралган.

Самарқанд вилоят божхона бошқармаси ахборот хизматин берган маълумотга кўра фуқаро А.Қ. эса ўз ёнида бундай товарлар йўқлигини айтганидан сўнг унинг бошқарувидаги автомашина холислар иштирокида кўздан кечирилди. Натижада автомашина ўриндиғи остига ва эшик қопламалари орасига хуфёна яширилган тамаки маҳсулотлари борлиги аниқланди.

Аниқланган ҳолат натижасида қонунбузардан тамаки маҳсулотлари ашёвий далил тариқасида олиб қўйилди. Ҳозирда ушбу ҳолат юзасидан текширув ҳаракатлари давом эттирилмоқда.

Эслатиб ўтамиз, амалдаги тартибларга кўра жисмоний шахслар томонидан четдан 10 қути тамаки маҳсулотларини божхона тўловларисиз олиб киришлари мумкин.