Буни кўриш керак. Уэйн Руни сўнгги дақиқаларда жамоасини голдан сақлаб қолиб, голли узатма берди (видео)

Англия терма жамоаси собиқ ҳужумчиси Уэйн Руни айни дамда фаолиятини АҚШнинг «Ди Си Юнайтед» клубида давом эттирмоқда.

32 ёшли Руни MLS’нинг навбатдаги турида «Орландо» жамоасига қарши баҳсда қаҳрамонлик кўрсатди. Учрашув асосий вақти 2:2  ҳисобида якунланётган паллада, ҳакам иккинчи бўлимга 6 дақиқа қўшиб беради.

Қўшиб берилган дақиқаларнинг бешинчиси ўтиб бораётган бир паллада «Ди Си Юнайтед» бурчак тўпи ишлаб олади. Жамоа дарвозабони ҳам гол уриш мақсадида рақиб дарвозаси олдиган етиб келди. Шу орада «Орландо» футболчилари тўпни қайтаришнинг уддасидан чиқиб, қарши ҳужумга ўтди. Уэйн Руни эса рақиб ҳужумчисини қувиб етиб, ундан тўпни олиб қўйди. Ва рақиб жарима майдончасига тўпни узатди. Рунининг узатмасини эса унинг шериги бош билан «Орландо» дарвозасига жойлаб қўйиб, жамоасининг ғалабасини таъминлади.

Маълумот учун, Уэйн 13 йил давомида «Манчестер Юнайтед» сафида ҳаракат қилди. 2018 йил ёзида эса «Эвертон» билан хайрлашиб, «Ди Си Юнайтед»га ўтганди.