Сингапурнинг Indorama компанияси Ўзбекистонда пахта кластерини яратиш учун 335 млн доллар сармоя киритади

Сингапурнинг Indorama корпорацияси Ўзбекистонда пахта кластерини яратишга 335 миллион доллар инвестиция киритади, деб ёзади Spot Вазирлар Маҳкамаси қарорига таяниб.

Июль ойида Сингапурнинг Indorama корпорацияси Ўзбекистонда пахта кластерини яратишни режалаштираётгани, компания ер ажратиш тўғрисида ҳукумат билан музокаралар олиб бораётгани хабар берилган эди.

Энди маълум бўлишича, кластер тўртта вилоятни қамраб олади: Жиззах, Сирдарё, Қашқадарё ва Фарғона. 225 миллион доллар пахта хом ашёси, маккажўхори ва бошқа маҳсулотларни етиштириш учун ишлатилади.

Бундан ташқари, компания пахта хом ашёсини чуқур қайта ишлаш ва пахтадан йигирилган ип ишлаб чиқаришни ташкил этиш (иккинчи босқич) учун яна 115 миллион доллар сармоя киритади.

Ишлаб чиқариш Indorama Kokand Textiles МЧЖ ҚКнинг мавжуд қувватларида жойлашади ва янги юридик шахс ташкил этилади.

Лойиҳа икки босқичга бўлинади: биринчиси Қашқадарё ва Сирдарё вилоятини қамраб олади. Иккинчиси (Фарғона ва Жиззах вилояти) ер участкалари аниқлаштирилганидан кейин бошланади.

Лойиҳанинг умумий муддати — 2019—2023 йиллар. Кутилишича, 1500 янги иш ўрни яратилади, бу ерда ишлаб чиқарилаётган пахта хом ашёси BCI стандартида («Экологик тоза пахта учун») бўлади.

Ушбу пахтадан тайёр маҳсулотларни жаҳоннинг етакчи брендларини (аниқлик киритилмаган) жалб этган ҳолда ишлаб чиқариш режалаштирилмоқда.