Тошкент шаҳрининг Юнусобод туманидаги Aurum 898 тунги клуби олдида 9 августга ўтар кечаси юз берган фожиа ҳақида аввал хабар берилган эди.
Шаҳар ИИББ ахборотига кўра, 25 ёшли эркин курашчи Жамшид Кенжаев клубга пичоқ билан кирмоқчи бўлган, бироқ клуб қўриқчилари унинг пичоқ билан киришига қаршилик кўрсатгач, Жамшид улардан бирининг қорнига мушт туширган. Шундан сўнг Жамшид ва қўриқчилар ўртасида муштлашув бошланган. Оқибатда Жамшид Кенжаев кўп тан жароҳати олган ва жароҳатлари сабаб тонгда касалхонада вафот этган.
UzNews’нинг хабарига кўра, мазкур воқеа сабаб пойтахтдаги узоқ йиллардан буён фаолият юритиб келаётган энг йирик тунги клуб фаолияти тўхтатилган. Таъкидланишича, 9 августдан 10 августга ўтар кечаси тунги клуб эшиклари бутунлай берк бўлган ва ҳатто бино қоровули ҳам бўлмаган. Юсунободда жойлашган ва эрталабки соат 06:00га қадар фаолият олиб борадиган клуб нима сабабдан ва қайси идора вакиллари томонидан ёпилгани борасида ҳозирча бирор расмий маълумот йўқ, дейилади хабарда.
Нашрнинг ёзишича, тунги клубда олдин фаолият олиб борган қўриқчилар Жамшид Кенжаевга ҳеч қачон қаршилик кўрсатмаган ва уни яқиндан таниган. Клубда қўриқчилар алмашганлиги ҳамда янгилар Жамшидни танимаганликлари сабабли ҳам бу воқеа рўй берган.
Маълумот учун Жамшид Кенжаев пичоқ билан жароҳат етказган қўриқчилардан бири Ш.Илясов 7-сон шаҳар клиник шифохонасига, А.Мирзаев эса 1-сонли Республика клиник шифохонасига ётқизилган. Жамшид Кенжаевнинг ўзи эса 7-сон шаҳар клиник шифохонасида вафот этган.
Ушбу ҳолат юзасидан 9 август куни Тошкент шаҳар прокуратураси томонидан Ш.Қиличевга нисбатан Жиноят кодексининг 25, 97-моддаси 1-қисми билан жиноят иши қўзғатилиб, у Жиноят-процессуал кодексининг 221-моддаси тартибида ушланган (милиция ахборотида Ш.Қиличевдан ташқари яна икки киши — бирининг исми Саидазим, иккинчисиники эса Жаҳонгир — қўлга олингани айтилган эди).
Прокуратура ахборотида қўшимча қилинишича, иш юзасидан тергов ҳаракатлари шаҳар прокуратурасининг Ўта оғир жиноятларни тергов қилиш бўлими томонидан олиб борилмоқда.
Изоҳ (0)