Москва мэри лавозимига номзод, РЛДПдан Давлат думаси депутати Михаил Дегтярев сайловда ғолиб чиқса, меҳнат муҳожирларига улар учун ўз ватанларида озиқ-овқат савдо-сотиғи бўйича шартномалар тузиш йўли билан иш ўринларини яратишга ваъда берди, деб ёзади Sputnik.
«Мен Осиёда, Ўрта Осиёда, Арманистонда озиқ-овқат ишлаб чиқарувчи фермалар, корхоналар билан келаси йилданоқ москваликлар учун озиқ-овқат маҳсулотларини сотиб олиш ҳақида қатъий шартномалар тузаман. Шу тариқа, мен мэр сифатида ўз ватанингизда иш ўринлари яратилишини кафолатлайман — биз москваликлар учун фойдали бўлиши мумкин бўлган ҳамма нарсани: сабзавотларни ҳам, меваларни ҳам, гўштни ҳам, парранда гўштини ҳам сотиб оламиз», — деди Дегтярев меҳнат муҳожирлари билан учрашувда.
Номзод, шунингдек, Россия пойтахти меҳнат муҳожирлари орасидан чиққан юқори синф мутахассисларига эҳтиёжманд эканлигини қўшиб қўйди.
«Биз Ўрта Осиё мамлакатлари, Молдова, Украинадан келган муҳожирларнинг болаларига таълим беришга тайёрмиз. Меҳнат муҳожирлари, юқори синф мутахассислари Москвага керак», — деди у.
Изоҳ (0)