Хоразмда фуқаронинг вафотидан 9 йил ўтиб унинг ўлими ҳақидаги ҳужжат яқинларига топширилди 

Хоразмда фуқаронинг вафотидан 9 йил ўтиб унинг ўлими ҳақидаги ҳужжат яқинларига топширилди. Бу ҳақда Давлат хизматлари агентлиги Хоразм вилояти бошқармаси матбуот хизмати «Дарё»га хабар берди.

Р.Р. Хоразм вилояти Хонқа туманида доимий яшаб келган. 2009 йили Россиянинг Астрахан вилояти Наримановский туманида вафот этган. Бироқ Россияда ҳам, Ўзбекистонда ҳам ўлим ҳолати ҳужжатларга қайд қилинмаган.

Минск конвенциясига асосан, Давлат хизматлари агентлиги Хоразм вилояти бошқармаси Россиядан Р.Р.нинг ўлими қайд этилмагани ҳақидаги маълумотномани олди.

Натижада 2018 йил 27 июль куни Р.Р.нинг ўлими қайд этилди ва тегишли ҳужжатлар Давлат хизматлари агентлиги Хонқа туман бўлими ходимлари томонидан марҳумнинг турмуш ўртоғига топширилган.