Олий ва ўрта махсус таълим вазирлиги, Ташқи ишлар вазирлиги ва бир неча олий таълим муассасалари ректорларидан иборат делегация АҚШнинг Вебстер университетида меҳмон бўлиб турибди. Бу ҳақда «Fledu.uz» хабар бермоқда.
26 июль куни Вебстер университетининг ТESL — инглиз тилини иккинчи тил сифатида ўқитиш ихтисослиги бўйича бир йиллик магистратура дастурини Ўзбекистон давлат жаҳон тиллари университетида очиш ҳақидаги келишув имзоланди. Бу Америка олий таълим муассасасининг Марказий Осиёдаги биринчи магистрлик таълим лойиҳаси бўлади. Келажакда бошқа мутахассисликлар бўйича ҳам ҳамкорликдаги таълим дастурларини йўлга қўйиш режалаштирилмоқда.
Жорий йилда бу дастурда иштирок этиш учун нафақат Ўзбекистон, балки, Марказий Осиёнинг барча давлатларидан мутахассислигидан қатъи назар бакалавр даражасига эга, инглиз тилидаги билим даражаси IELTS – 6 дан кам бўлмаган ёки шунга тенглаштирилган тил билимини баҳолаш бўйича бошқа халқаро сертификатларга эга ёшлар ҳужжат топшириши мумкин.
Ўзбекистон ҳукуматининг саъй-ҳаракатлари билан ёшларнинг халқаро даражада олий таълим олишлари учун тўлов-контракт пули миқдори АҚШдаги каби 27 минг доллар эмас, балки мамлакатдаги халқаро ОТМлар магистрлик даражаси учун тўланаётган қийматга яқин бўлиши кўзда тутилган.
ЎзДЖТУдаги Вебстер университети магистратурасида америкалик мутахассислар билан бир қаторда махсус танловдан ўтган маҳаллий ўқитувчилар ҳам дарс беради.
Ушбу магистратура дипломи билан битирувчилар нафақат Ўзбекистон, балки бутун дунё олий таълим муассасаларида дарс бериш имкониятига эга бўлади.
Вебстер университетининг ЎзДЖТУдаги магистратурасига қабул жорий йил август ойидан бошланади.
Эслатиб ўтамиз, Тошкент шаҳрида келгусида мазкур университетнинг филиали очилиши ҳам режалаштирилган.
Изоҳ (0)