Ўзбекистон Қаҳрамони Сиёсатхон Абдуллаева 27 июль куни 78 ёшида вафот этди. Бу ҳақда ЎзА хабар бермоқда.
Сиёсатхон Абдуллаева 1940 йилда Андижон туманида туғилганди. Меҳнат фаолиятини Олтинкўл туманидаги жамоа хўжалигида оддий ишчи сифатида бошлаб, кейинчалик шу тумандаги 2-болалар боғчасида тарбиячи, боғча мудираси вазифаларида меҳнат қилди.
Деҳқончилик касби ва илмига алоҳида меҳр қўйган Сиёсатхон Абдуллаева Андижон Пахтачилик институтини агроном йўналиши бўйича тугаллаганидан сўнг яна қишлоқ хўжалиги соҳасига қайтиб, 1978 йилдан мазкур туманда ширкат хўжалиги бош пудратчиси вазифасида ўз меҳнат фаолиятини давом эттирди. Мамлакатда фермерлик ҳаракати бошлангандан сўнг «Олтинкўл водий гулшани» фермер хўжалигини ташкил этиб, умрининг охирига қадар шу лавозимда иш олиб борди.
Абдуллаева ўзининг кўп йиллик фаолияти давомида пахтачилик, ғаллачилик ва қишлоқ хўжалигининг бошқа тармоқларини, фермерлик ҳаракатини ривожлантиришга муносиб ҳисса қўшди. Моҳир ва тажрибали агроном раҳбарлигидаги фермер хўжалиги қишлоқ хўжалиги маҳсулотларини етиштириш бўйича барча шартнома мажбуриятларини муваффақиятли бажариб, мамлакат миқёсида энг юқори кўрсаткичларга эришиб келган.
Бой билим ва ҳаётий тажрибага эга бўлган Сиёсатхон Абдуллаева жамоат ишларида ҳам фаол иштирок этиб, эл-юрт ўртасида катта обрў-эътибор қозонган эди.
Сиёсатхон Абдуллаеванинг кўп йиллик самарали меҳнатлари давлат томонидан муносиб тақдирланган, «Дўстлик» ордени ва «Ўзбекистон Қаҳрамони» унвони билан мукофотланган эди.
Ўзбекистон Қаҳрамони вафоти муносабати билан Президент Шавкат Мирзиёев, Бош вазир Абдулла Арипов ва бошқа раҳбарлар ҳамдардлик билдирди.
Изоҳ (0)