Москвадаги «Матросская тишина» қамоқхонасида сақланаётган Ўзбекистон фуқароси Маъруфжон Шакаров очлик эълон қилганига бир ойдан ошди. Бу ҳақда «MK.ru» хабар бермоқда.
Шакаровнинг шикоятига асосан ишни апелляция тартибида кўриб чиққан Москва шаҳар суди унинг озодликдан маҳрум этиш муддатини 10 йилдан 5 йилга камайтирди, бироқ 21 ёшли йигит буткул оқланишини талаб қилмоқда.
Маъруфжон Шакаров охирги пайтда жуда заифлашиб қолган, зўрға гапиради. Қамоқхона маъмурияти ва шифокорлар уни очликни тўхтатишдан қайтара олмади.
Тошкентдаги авиация техникумини битирувчиси фуқаро авиацияси институтига кириш ва учувчи бўлиш ниятида Россияга келганди. Бундан бир йил аввал йигитни полиция патрули тўхтатади. Полициячиларнинг айтишича, Маъруфжон қочишга уринган, уни ушлашганида эса ёнида наркотиклар моддалар солинган 7 та ўрам бўлган.
Шакаров икки полициячига ҳужжатини кўрсатгани, учинчи полициячи ҳам ҳужжатларни кўрмоқчи бўлганида эътироз билдиргани, меҳмонларга нисбатан ҳурматда бўлиш лозимлигини айтганини таъкидламоқда. Полициячилар бундай «беадаблик»дан дарғазаб бўлиб, уни ўрмонга олиб кетиб, калтаклаган, электрошокерлардан фойдаланган. Охир-оқибат унга нисбатан жиноий иш қўзғатилган.
«Ўзбекистонлик йигитнинг айбини исботлайдиган далиллар етарли эмас. Фақат унинг телефонидаги Telegram мессенжерида Маъруф ёнидаги моддаларни олиши мумкин бўлган жой фотосуратлари бўлгани айтилади. Кейинроқ барча 37 та фото телефондан йўқолиб қолади. Уларни ҳатто айбланувчининг ўзига ҳам кўрсатишмаган», – дея қайд этади нашр.
Ҳибсхона тиббиёт қисми бошлиғи ҳужжатлар, экспертиза хулосаси билан танишди. У ва психиатрия экспертизаси йигитда гиёҳвандлик аломатларини аниқламади.
Изоҳ (0)