Жанубий Корея ва КХДР молиявий лойиҳалар бўйича музокаралар ўтказади
Сеул Пхеньян билан молиявий лойиҳаларни тикламоқда. Бу ҳақда Жанубий Кореянинг миллат бирлашиши вазирлиги маълумотига таяниб, «РИА Новости» хабар берди.
Темирйўл ва автомобиль йўлларини тиклаш, шунингдек, ўрмон хўжалиги соҳасида ҳамкорлик қилиш бўйича музокаралар шу ҳафтага режалаштирилган.
Транспорт масаласи бўйича ишчи гуруҳ учрашуви 26 ва 28 июнь кунлари ҳарбийлардан ҳоли ҳудудда бўлиб ўтади. Ўрмон хўжалиги бўйича музокаралар 4 июлга режалаштирилган. Учрашув жойи ҳозирча белгиланмаган. Транспорт, атроф-муҳитни асраш, ўрмон хўжалиги соҳалари бўйича вазир ўринбосари даражасидаги амалдорлар делегацияларига раислик қилади.
«Темирйўл ва автомобиль транспорти, шунингдек, ўрмон хўжалиги бўйича бўлиб ўтадиган музокараларда Пханмунжом декларациясига амал қилиш масалалари муҳокама қилинади, шу орқали биз Жануб ва Шимолнинг кейинги узоқ муддатли муносабатлари, Корея яриморолидаги барқарор тинчлик учун асос яратамиз», — дейилади Жанубий Кореянинг миллат бирлашиши вазирлиги хабарида.
Эслатиб ўтамиз, апрель ойи охирида сўнгги 10 йил давомида биринчи марта икки Корея раҳбарлари саммити ташкил қилинди. 23 июнь, шанба куни Пханмунжом ҳарбийлардан ҳоли ҳудудида икки мамлакат етакчиларининг 2018 йил ҳисобидан иккинчи учрашуви бўлиб ўтди.
