Миллий матбуот марказида «Ўзбеккино» миллий агентлиги томонидан 2017—2021 йилларда кино санъатининг ролини ошириш борасида белгиланган чора-тадбирлар, амалга оширилган ишлар таҳлилига бағишланган матбуот анжумани ташкил этилди. Бу ҳақда ЎзА хабар берди.
Тадбирда миллий кино соҳасидаги ислоҳотлар ҳақида «Ўзбеккино» миллий агентлиги бош директорининг биринчи ўринбосари Шуҳрат Ризаев маълумот берди.
Агентлик қошидаги Бадиий кенгаш томонидан 2018 йилга мўлжалланган кинолойиҳалар танлови эълон қилинди. Унда тарихий мавзудаги лойиҳаларга асосий эътибор қаратилади.
Бадиий кенгаш томонидан тасдиқланган 23 бадиий фильмнинг 11 таси тарихий мавзуда бўлиб, уларда Имом ат-Термизий, Жалолиддин Мангуберди, Ишоқхон Ибрат, Амирий ва Нодира, Абдулла Авлоний, Ҳамид Олимжон ва Зулфия, Саид Аҳмад ва Саида Зуннуноваларнинг ибратли ҳаёти ҳикоя қилинади. Шунингдек, мўғул босқинчилари, Иккинчи жаҳон уруши даҳшатларига қарши курашган қаҳрамонлар жасорати талқин этилади.
Айни пайтда давлат буюртмаси асосида 2001 йил 11 сентябрда АҚШда содир бўлган фожиа натижасида юзага келган таҳликали вазиятда экипажни қутқара олган ўзбек учувчиси, Ўзбекистон Қаҳрамони Зархўжа Саидазимов, 2000 йилдаги Узун ва Сариосиё воқеалари, мўйноқлик ногирон қизнинг матонати ҳақида ва томошабинлар томонидан илиқ кутиб олинган «Барон - 2» каби фильмларни cйпатга олиш ишлари бошлаб юборилди.
Давлат раҳбарининг тавсия ва таклифлари асосида буюк мутафаккир аждодларимиз Алишер Навоий, Баҳоуддин Нақшбанд, Хожа Абдулхолиқ Ғиждувоний, Абул Муъин Насафийларнинг ҳаёти ва ижоди ҳақида яхлит тасаввур берувчи ҳужжатли фильмлар яратилмоқда.
«Ўзбеккино» миллий агентлиги Хитой, Япония, Россия, Ҳиндистон, Туркманистон, Қирғизистон киноижодкорлари билан ҳамкорликда фильмларни суратга олишни режалаштирган. Йил охиригача ҳиндистонлик киноижодкорлар билан «Шоду хуррамлик», қирғиз киноижодкорлари билан «Сарвқомат дилбарим» бадиий фильмларини ҳамкорликда суратга олиш жараёнини якунлаш режалаштирилган. Шунингдек, Абдураҳмон Жомий, Чингиз Айтматов, Абай сингари буюк адиблар ҳақида ҳужжатли фильмлар суратга олиш жараёни бошланган.
Ёш томошабинларга мўлжалланган анимацион фильмлар яратиш «Ўзбеккино» миллий агентлигининг доимий эътиборида. Ҳозирда «Узвийлик», «Ғилдиракли уй», «Довюрак ошпаз», «Кенжа ботир-2», «Matiz’нинг саргузаштлари» каби кино ва мулътфильмларни суратга олиш ишлари қизғин паллада.
Изоҳ (0)