«Ўзбекэнерго» АЖда «Энг фаол ёш энергетик» танловининг республика босқичи бўлиб ўтди

«Ўзбекэнерго» АЖда «Энг фаол ёш энергетик» танловининг республика босқичи бўлиб ўтди. Танлов корхоналарда меҳнат қилаётган ёш мутахассисларни ҳар томонлама қўллаб-қувватлаш, тараққиётга хизмат қилувчи инновацион ғоялар, илмий-техник лойиҳалар, ихтиролар ва таклифлар билан фаол, иқтидорли ёш мутахассисларни аниқлаш, уларни рағбатлантириш мақсадида ташкил этилди, деб ёзади ЎзА.

Танловнинг биринчи босқичида корхона ва ташкилотлардан 35 ёшгача бўлган мутахассислардан 120 нафарга яқини иштирок этди. Танловнинг республика босқичига улар орасидан энг муносиб деб топилган 19 нафари танлаб олинди. Иштирокчилар тақдим этган инновацион лойиҳаларнинг асосий қисми энергия тежамкорлигига йўналтирилган технологиялар асосида ишлаб чиқилган бўлиб, улар орасидан энг саралари танлаб олинди.

Танловнинг якуний босқичини ўтказиш бўйича Республика ишчи гуруҳи йиғилишининг хулосасига кўра 1-ўринга «Янги Ангрен ИЭС» АЖ ходими Азиз Раҳмонов муносиб топилди. 2-ўрин «Навоий ИЭС» АЖ ходими Аслон Аслонов, 3-ўрин «Ўзелектртармоқ» УК ходими Умиджон Баратовга насиб этди.

Танлов ғолибларига диплом ва эсдалик совғалари топширилди.