Халқаро семинарда Ўзбекистондаги яйлов ерларни асраш масаласи муҳокама қилинди
«Давергеодезкадастр» қўмитаси вакиллари 19—21 июнь кунлари Македониянинг Скопье шаҳрида бўлиб ўтган халқаро семинарда иштирок этди. Бу ҳақда қўмита матбуот хизмати «Дарё»га хабар берди.
БМТнинг Европа ва Марказий Осиё озиқ-овқат ва қишлоқ хўжалиги регионал бюроси томонидан (FAO) 19—21 июнь кунлари Македониянинг Скопье шаҳрида «Деградацияга учраб чўлланишга сабаб бўлаётган қишлоқ хўжалик ерларини модернизация қилиш ва олдини олиш» мавзусида халқаро семинар ташкил этилди. Семинарда 34 та давлат вакиллари қаторида «Давергеодезкадастр» қўмитасининг делегацияси ҳам иштирок этди.
Семинарда «Ўздаверлойиҳа» давлат илмий-лойиҳалаш институти раҳбари Руҳиддин Тўраев чўл минтақалари муаммоларига эътибор қаратди ва бу масала семинарнинг асосий мавзулардан бирига айланди. Шунингдек, семинарда Ўзбекистонда яйлов ерларини асраш бўйича амалга оширилаётган ишлар тўғрисида маълумот берилди.
