Халқ таълими вазирлиги энг муҳим вазирлик бўлади

Таълим тизими – фарзандлар камоли билан бевосита боғлиқ эканини ҳеч ким инкор эта олмайди. Айни пайтда мактабларда 6 миллион бола таълим олмоқда. Шунинг учун таълим тизими инфратузилмаси замон талабларига мувофиқ тубдан ўзгартирилади, бутунлай янгиланади, деб ёзади ЎзА.

Шу мақсадда Президент Шавкат Мирзиёев ишонч билдирган халқ таълими янги вазири Шерзод Шерматов, унинг ўринбосари вазифасини бажарувчилар — Сарвар Бобохўжаев, Алишер Умаров, Отабек Назировларга зарур барча ваколатлар берилади. Мазкур вазирлик энг муҳим вазирликка айлантирилади. Тузилмага ҳар томонлама ёрдам кўрсатилади.

Бу Вазирлар Маҳкамасида Президент Шавкат Мирзиёев томонидан халқ таълими тизимини тубдан ўзгартириш, уни замон талабларига мувофиқ такомиллаштириш борасида қўйилган вазифалар ижросига бағишлаб бош вазир Абдулла Арипов раҳбарлигида ўтган видеоселектор йиғилишида алоҳида таъкидланди.

Халқ таълими тизимига малакали мутахассислар жалб этилади. Шу мақсадга қаратилган Президент қарори қабул қилинади.

Тизимга ажратилаётган маблағларнинг тўғридан-тўғри, манзилли етиб бориши йўлга қўйилади. Тизимга тааллуқли маблағлар Халқ таълими вазирлиги томонидан тақсимланади. Соҳада мақсадсиз маблағ сарфлаш бартараф этилади.

Таълим тизими, хусусан, Халқ таълими вазирлигини ҳар томонлама қўллаб қўллаб-қувватлаш барча раҳбарларнинг муҳим вазифаларидан бирига айланади.