Сурияда жангариларнинг миномётдан ўққа тутиши оқибатида 2 киши ҳалок бўлди

Сурия жанубидаги Сувейда шаҳрида ноқонуний жиноий уюшма жангариларининг аҳоли яшовчи кварталларни миномётдан ўққа тутиши оқибатида икки киши ҳалок бўлди. Яна уч киши яраланди. Бу ҳақда SANA Сурия миллий агентлиги маълумотига таяниб, «РИА Новости» хабар бермоқда.

Агентликка кўра, отишмалар оқибатида шаҳарда электр узатиш тўхтаган. Мазкур отишма ҳафта мобайнидаги иккинчиси бўлди. Жангарилар қўшни Деръа вилоятидан ўт очганлиги таъкидланмоқда.

Сурия артиллерияси, ўз навбатида, жангариларнинг Деръадан шимоли-шарқдаги Ал-Хирак ва Деръадан жанубдаги Басер ал-Харир қишлоғидаги позицияларига зарбалар берган.