Коррупцияга қарши курашиш бўйича республика идоралараро комиссиясининг давлат ташкилотларининг коррупцияга қарши фаолияти бўйича рейтингида Адлия вазирлиги юқори самарадорликка эришган давлат органи, деб топилган эди. Бу ҳақда ЎзА хабар бермоқда.
Бошқа идораларда бу борада сезиларли силжишлар ҳали кўзга ташланмаётган бир пайтда кўп минг кишилик жамоага эга адлия идоралари янада юқори марраларни кўзламоқда. Аниқроқ айтганда, тизимда коррупцияга умуман йўл қўйилмаслигини таъминловчи очиқлик ва шаффофликка катта эътибор қаратилмоқда.
Дастурга кўра ҳафтанинг маълум куни адлия органларида «Ҳуқуқий билимлар куни», 2018 йилнинг июль ойи эса барча адлия органлари ва муассасаларида «Одоб-ахлоқ ойлиги», деб эълон қилинди.
Тадбирлар доирасида ижтимоий тармоқларда ва оммавий ахборот воситаларида турли чиқишлар қилинади. Шунингдек, адлия органлари фаолиятининг очиқлиги ва шаффофлигини таъминлаш, коррупция ва бошқа ҳуқуқбузарликларнинг олдини олишга қаратилган ҳуқуқий тарғибот тадбирлари ташкил этилади.
Дастурда адлия органлари ва фуқаролик жамияти институтларининг коррупцияга қарши курашиш борасидаги ўзаро ҳамкорлиги самарадорлигини ошириш бўйича қатор чора-тадбирлар ҳам белгиланган.
Одоб-ахлоқ қоидаларига риоя қилган ва хизмат вазифасини виждонан бажарган энг намунали ходимларни рағбатлантириш ҳам кўзда тутилган.
Изоҳ (0)