«Ўзбекистон металлургия комбинати» АЖ жорий йилнинг ўтган 5 ойи давомида 436 минг тонна металл прокати ишлаб чиқарди
«Ўзбекистон металлургия комбинати» акциядорлик жамияти томонидан жорий йилнинг ўтган беш ойи давомида янги натижа — 436 минг тонна металл прокати ишлаб чиқаришга эришди. Бу ҳақда «Халқ сўзи» хабар бермоқда.
Ушбу кўрсаткичга сўнгги 20—25 йил ичида илк бор эришилгани унинг аҳамиятини яққол кўрсатиб турибди. Ўтган давр ичида металл парчаларни йиғиш ва тайёрлаш, суюқ пўлатни эритиш ҳажмлари ҳам сезиларли даражада ошган.
Президентнинг 2017 йил 15 сентябрдаги «Ўзметкомбинат» АЖ бошқаруви тизимини янада такомиллаштириш чора-тадбирлари тўғрисида»ги қарорига асосан, комбинатнинг бошқаруви SFI Management Group компаниясига берилган эди. Мамлакатда илк бор қўлланилган бундай амалиёт бугун ўзини оқлади.
Ўтган йилнинг биринчи чорагида 247 минг тонна металл прокати тайёрланган бўлса, жорий йилнинг шу даврида 337 минг тонна навли прокат ишлаб чиқарилган.
Комбинатнинг иқтисодиёт бошқармаси бошлиғи Асрор Тўрабоевнинг айтишича, корхона тўлиқ ишончли бошқарувга ўтганидан сўнг, жорий йилнинг январь—май ойларида 2 триллион 123,9 миллиард сўмлик маҳсулотлар ишлаб чиқарилган. Бу ўтган йилнинг шу давридагига нисбатан 46,8 фоизга ортиқдир.
