Вазирлар Маҳкамасининг «Умумий ўрта таълим муассасалари битирувчиларини рағбатлантиришни янада такомиллаштириш чора-тадбирлари тўғрисида»ги қарори лойиҳаси Норматив ҳуқуқий ҳужжатлар лойиҳалари муҳокамаси порталига жойлаштирилди.
Лойиҳада 11 йиллик умумий ўрта таълимга ўтилиши муносабати билан умумий ўрта таълим муассасалари битирувчилари учун олтин ва кумуш медалларни таъсис этиш таклифи киритилмоқда.
Лойиҳага кўра, 11-синф битирувчилари олтин медални олиш учун:
9-синфни битирганлик тўғрисидаги аъло даражали шаҳодатнома;
10—11-синфлардаги барча фанлар бўйича оралиқ, якуний назоратлар ҳамда чорак ва йил якунлари бўйича аъло баҳолар;
Намунали хулққа эга;
Жамоат ишларида фаол бўлишлари жоиз.
Кумуш медални:
9-синфни битирганлик тўғрисидаги аъло даражали шаҳодатнома;
10-11-синфлардаги барча фанлар бўйича йил якунига кўра аъло баҳолар;
Намунали хулққа эга;
Жамоат ишларида фаол бўлган битирувчилар қўлга кирита олади.
Олий таълим муассасаларига киришда медаллар соҳибларига қуйидаги имтиёзларни тақдим этиш таклиф этилмоқда:
Олтин медаль — кириш имтиҳонларида тўплаган умумий баллга 50 фоиз;
Кумуш медаль — кириш имтиҳонларида тўплаган умумий баллга 30 фоиз.
Олтин ва кумуш медалларга эга бўлган ўқувчиларга бериладиган имтиёз муддатини 1 йилгача қилиб белгилаш режалаштирилган.
Шунингдек, қарор билан умумий ўрта таълим муассасалари битирувчиларини аъло билими, намунали хулқи ва фаол жамоатчилиги учун олтин ва кумуш медаль билан тақдирлаш тартиби тўғрисидаги низомни ҳамда олтин ва кумуш медалларнинг тавсифини тасдиқлаш кўзда тутилган.
Халқ таълими вазирлиги олтин ва кумуш медалларнинг ўқувчиларга холислик ва одиллик тамойилларига амал қилган ҳолда топширилишини таъминлайди.
Бундан ташқари, вазирлик ҳар йили 10 июнга қадар ўзининг веб-сайтида медаллар билан тақдирланган битирувчилар ва уларга берилган шаҳодатномалар тўғрисидаги маълумотларни жойлаштиради.
Изоҳ (0)