Италиядаги черковнинг тазарру кабинасидан 36 минг евро топилди
Италиядаги черковлардан бирининг тавба-тазарру кабинасида бир неча ўн минг евро топилди. Топилма билан полиция қизиқмоқда, деб хабар беради Premier нашри.
Пуллар Ватикандан бир неча юз метр узоқликда жойлашган Санта-Мария-делле-Грацие-алле-Форначи-фуори-Порта-Каваллежери ибодатхонасида муассаса хизматчиси томонидан топилган. Авлиё ота ўриндиғининг тагида 50 евролик банкноталар билан тўлдирилган иккита сумка бўлган. Уларнинг ичида жами 36 минг евро бўлган.
Полиция томонидан маълум қилинишича, банкноталар янги бўлган, кузатув камераларидаги тасвирлар орқали номаълум киши хайрия қилмоқчи бўлгани ёки пуллардан қутулмоқчи бўлганини аниқлашга ҳаракат қилинган.
Агар полиция пуллар ноқонуний йўл билан қўлга киритилганини аниқласа, улар мусодара қилинади. Агар бундай бўлмаса, полиция уларнинг аввалги эгасини ва у нима учун пулларни ташлаб кетганини аниқлайди.
