Россия давлат кинематография институти (ВГИК) Ўзбекистонда ўз филиалини очиши мумкин. Бу Ўзбекистон президентининг миллий киноиндустрияни такомиллаштиришга оид қўшимча чора-тадбирлар тўғрисидаги қарори лойиҳасида белгиланган, дея хабар беради Sputnik.
Ҳужжатда 2020/2021-ўқув йилида кинематография соҳасида юқори малакали кадрлар тайёрлаш бўйича ВГИК филиали ёки Ўзбекистон билан ҳамкорликдаги факультети очилиши кўзда тутилган.
Бу ерда ВГИК олий курслари ва ассистентура-стажировкасида тайёргарликдан ўтган мутахассислар ҳамда мунтазам равишда мастер-класслар ўтувчи россиялик мутахассислар фаолият олиб бориши режалаштирилмоқда.
Шунингдек, жорий ўқув йилидан бошлаб Давлат санъат ва маданият институтининг иқтидорли битирувчилари ВГИКнинг «Кино ва телевидение» олий курсларида ўқиш учун жўнатилади. Институтнинг «Ижрочи продюсер» ва «Кинорежиссура ва кинодраматургия» йўналишларида таҳсил олувчи саралаш асосида танлаб олинган бакалавр даражасидаги мутахассислари ҳам бундай имкониятга эга бўлиши мумкин.
Ҳамкорликнинг яна бир йўналиши — 2019/2020-ўқув йилидан бошлаб Санъат ва маданият институтининг бакалавриат йўналишларидаги иқтидорли битирувчилари «Драматургия» ва «Аудиовизуал санъат режиссураси» ихтисосликлари бўйича ВГИК ассистентура-стажировкасига жўнатилади.
Изоҳ (0)